Alkansya sa Bokasyon

Suporta sa seminarista. Mao kini ang tumong sa ginapahigayong pagbuak sa alkansya matag tuig. Kini gikan sa 63 GKKs sa Bunawan ug ginahatud sa parokya kada pista. Pagpadayag kini sa paghigugma sa Bunawenyong seminarista nga nitubag sa tawag sa pagkabalaan. Kining maong best practice nasugdan ni Rev. Fr. Jovil Bongay, DCD ug padayong ginahimo sa parokya. Mineral water bottle, kahoy o kawayan og uban pang gamit nga pwede masudlan ang ginahimong sudlanan sa kwarta.

Matud pa sa mga Pangulo sa Katilingban nga sila Juanita B. Labriga og Nancy S. Duran, nagasugod ang paghulog sa alkansiya usa ka bulan human ang kapiyestahan aron pag-abot niini, daghan na ug matigom ang mga parokyano. Sila nanghinaut nga ang mga seminarista mupadayon og magmalampuson sa ilang bokasyon.

Ang bag-ong kura paroko Fr. Rolando Mandreza ug ang proyekto alang sa bokasyon, duha lamang sa daghang rason sa pagpasalamat sa tanang parokyano. Kahinumduman nga human mulagda sa resolusyon ang mga Bunawan aron sa pagmugna sa parokya, gimanduan ni kanhing Obispo sa Dabaw, Msgr. Clovis Thibault ang usa ka representante aron pagsusi sa lugar nga pagatukuran.

Tungod sa paghatag ug luna sa mag-asawang Casiano ug Josefina Perez Salas nasugdan ang pagpatukod sa maong simbahan ug niadtong Pebrero 1962, gilagdaan ang kasulatan nga usa na kini ka parokya. Ang unang nadestino nga pari isip kura paroko mao si Fr. Carol Bernard, usa ka PME. (SJP SoCCom)