Malampuson sa tawag misyon

Ang Pangulo sa Pagpanudlo (PSP) sa Parokya sa San Miguel – Panacan Zona 2 nagmalampuson sa tawag sa misyon pinaagi sa usa ka adlaw nga Pre-Confirmation Catechesis niadtong Agosto 26, 2018, sa GKK San Isidro Labrador, Bolinao Site Km. 12, Brgy. Sasa. Sugod 8:00 sa buntag ug nahuman 3:30 sa hapon, 40 ang nagpalista ug 39 ka partisipante ang nakatambong nga nag-edad 12 pataas na binunyagan ug nakadawat na sa Sakramento sa Eukaristiya ang buot mudawat sa Sakramento sa Kumpirma. Sa Septyembre 1, 2018 sa maong Parokya uban sa mga Zona na sakop niini ang adlaw sa pagdawat sa Sakramento sa Kumpirma.

Ang ZONA 2 sa Parokya sa San Miguel – Panacan gilangkuban sa lima (5) ka Gagmay’ng Kristohanong Katilingban (GKK): Immaculada Concepcion, Santo Rosaryo, San Isidro Labrador, San Juan Magbubunyag ug Sagrada Familia. Gipangulohan ni Sis. Carolina Geraga – Zone 2 PSP Leader uban sa makugihong PSP Coordinator – SMP na si Sis. Marilou V. Ipal ug uban sa kooperasyon sa kauban na mga Katekista sa matag GKK ang nagpatigayon sa maong seminar.

Diha sa katekismo, gipasabot kanila na ang Sakramento nagtimaan sa gugma sa Dios; ang pito (7) ka mga Sakramento gitukod ni Kristo ug ang Kumpirma Sakramento sa pagpasakop matod pa ni Sis. Susan Sastre; ug gipalayom ni Sis. Carolina Geraga, ang Sakramento sa Kumpirma nagpalig-on ug nagpabaskog sa grasya sa Bunyag ug pagdawat pag-usab sa Espiritu Santo nga maghimo kanatong maisogon sa pagpanalipod sa atong pagtoo na adunay usa ka Dios ug Tulo ka Persona ug mamahimong saksi ni Kristo pinaagi sa pagsangyaw sa Iyang pulong ug buhat.

Ug siya nidugang na ang unang Kumpirma nahitabo niadtong 33 AD – adlaw sa Pentekostes. Ang mga 12 Apostoles uban ni Santa Maria nakadawat sa mga gasa gikan sa Espiritu Santo na naghimo kanilang lig-on na magsasangyaw.

Dugang pa ni Sis. Nancy Cutler, adunay 7 ka gasa ang Espiritu Santo (Kaalam, Pagsabot, Kinaadman/Kahibalo, Pagtambag, Kalig-on, Ka-Diosnon ug Kahadlok sa Dios) ug kini mubunga kon atong atimanon ug palambuon, gamiton sa hustong paagi ug ipaambit ngadto sa uban aron mamahimong buhing saksi ni Kristo.

Matod pa ni Sis. Michelle Dastol na ang Obispo ang may katungdanan sa paghatag sa Rito sa Sakramento sa Kumpirma piaagi sa pagpandong sa iyang kamot ngadto sa Kumpirmahanan uban sa pagdihog sa Krisma; ug nanghinaut si Sis. Ivy Gladys Cabasag, nga ang Nakumpirmahan dili makalimot sa ilang katungdanan na mamahimong lig-on ug hamtong nga saksi ni Kristo sa pagtudlo, pag-alagad ug pag-ampo ug nagpahinumdon na ang ninong/ninang adunay katungdanan usab ngadto sa Gikumpirmahan, ang paggiya, pagtabang ug mamahimong maayong panig-ingnan ngadto kanila.

Nanghinaut ang mga Katekista na ang 39 ka buok nga nagmalampusong nakahuman sa katekismo sa Kumpirma ug mudawat sa Sakramento sa Kumpirma nga human nila makab-ot ang gasa sa Espiritu Santo, mopadayon sila sa ilang misyon ug maghatag og kahayag ngadto sa uban ug mamahimong buhing saksi ni Kristo. (Rea Agdon Sarte | GKK Sec. SoCCom)