Ika-34 nga pista sa Malabog malampuson

Nagmalampuson ang pagsaulog sa ika-34 ka tuig nga kapistahan sa Patron Sr. San Roque Parish, Malabog niadtong Agosto 16.

Alas 11:00 sa buntag gisugdan ang Pontifical mass nga ang nangulo mao ang atong halangdong Arsobispo sa Davao nga si Most Rev. Romulo G. Valles, D.D.

Diha sa iyang homiliya kita gihagit nga magpabiling mapasayloon, manghinatagon ug mapaubsanon. Aduna siyay mensahe para kay Fr. Arnold nga tagaan og bili ang mga balo, ilo, stranger o mga langyaw nga isipon sila nga mga people of God, sa imong misyon sa pagpangalagad aron ma-inspire ang mga tawo nga madool sila sa Dios ug dili kalimtan ang talagsaong mga buhat sa Ginoo. Ang hagit niya para kanatong tanan mao nga mahisama kita sa character sa atong Ginoo, be forgiving and merciful, to love one another. Gisunod ang pag-install sa atong bag-ong kura paroko nga si Rev. Fr. Arnold Balaquinto, mga PPC members, GSL ug staff sa simbahan.

Human sa misa gikompirmahan ni Abp. Valles ang 70 ka mga bata sa San Roque Parish Malabog.

Nagpadayon sa likod ang programa nga gipangulohan sa mga Pangulo sa Batan-on. Aduna kini Purok display sa 11 ka sona, Larong Pinoy, presentation sa Mangmang and Canoy Integrated School fancy drill ug basketball sa mga pari ug mga GSL… Karon ang San Roque Parish, Malabog aduna nay 54 ka GKK ug 10 na ka mga kura paroko ang na assign dinhi, ika-10 mao si Fr. Arnold Balaquinto. Mapasalamaton siya sa katawhan nga niduyog kaniya, sa mga pangulo ug mga bisita. (Imelda C. Overiz | SRP Malabog SoCCom)