33rd Kadayawan gisaulog sa dakbayan

Pormal na nga giablihan ang 33rd Kadayawan Festival niining tuig, alas dos sa hapon sa Magsaysay Park ning syudad sa Davao. Gipahigayon ang “Subang Sinugdanan” mao ang pagpakita o pagsa-ulo sa mga nahimong barter sa onse ka tribu nga ania sa syudad alang sa panginabuhi.

Alas 3 sa hapon gipahigayon ang Santos nga misa nga gipanguluhan ni Catholic Bishops Conference of the Philippines President ug Davao Archbishop Romulo Valles, DD nga gitambungan mismo ni Mayor Inday Sara Duterte Carpio ug mga opisyales sa syudad.

Kansang mapasalamaton ang arsobispo tungod nahimong kabahin ang simbahan sa pagsaulog sa Kadayawan pinaagi sa pag-imbita kaniya nga magpahigayon sa Santos nga misa. Nahimong pinasahe ang maong pagsaulog tungod panahon sa pangaliya, adunay usa ka representante gikan sa mga kaigsoonang Muslim ug usa ang gikan sa mga Lumad ang gihatagan sa higayon nga mag-ampo.

Samtang mapasalamaton si Davao City Mayor Inday Sara Duterte Carpio sa mga pribadong sektor ug organisasyon nga misuporta sa Kadayawan Festival, sumala pa nga dako ilang nahimong natampo ilabina ang ilang pag sponsor.

Miawhag na lamang ang Mayor sa katawhan nga mogawas sa panimalay ug makighiusa sa pagsaulog, ug iyang gipanaad nga gihimo sa kasundalohan ug kapulisan ang ilang katungdanan aron walay mahitabong dautan sa okasyon.

Samtang nahibaloan nga ang Kadayawan Festival sa syudad, gisaulog alang sa pag-ila sa mga nagkadaiyang tribo sa syudad ilabina nga kabahin sila sa pag-lambo niini.

Giila ang onse ka tribo nga mao ang Ata, Obu-Manuvu, Matigsalog, Tagabawa, Klata, Tausug, Maguindanaon, Iranon, Kagan, Maranao ug Sama.