Tinuod nga rason sa pagsunod kang Kristo

Ikakawhaan ug usa nga Dominggo sulod sa Ordinaryong Panahon
Joshua 24:1-2, 15-17, 18 / Psalms 34:2-3, 16-17, 18-19, 20-21, 22-23 / Ephesians 5:21-32 / John 6:60-69

Kadtong ni-aging semana nagkita mi sa akong suod nga higala ug kauban sa trabaho sa usa ka dakong kompanya dinhi sa atong siyudad. Nagdahom ko nga siya nagpadayon sa pagtrabaho sa maong kompanya, apan pakyas ako tungod kay siya ni-undang na man diay. Akong gipangutana kung unsa ang hinungdan, ug siya mitubag, “Kapoy nako, wala nakoy gana, ug wala nako kasabot sa dagan sa administrasyon.”

Ang kasinatian sa akong higala, dili halayo sa kasinatian sa mga disipulo ni Kristo nga atong nadungog sa Ebanghelyo. Ni-abot gayod sa punto nga ang mga disipulo namugnaw ug wala na makasabot sa ilang tinuoray nga rason nganong nisunod sila kang Kristo. Nahitabo kini tungod kay wala man nila matungkad pag-ayo ang tinuod nga kahulugan sa mga pagtulun-an ni Hesus ug gani sila dili makadawat niini.

Apan kung atong susihon unsa pod kaha ang mga hinungdan nganong mibiya man sila kang Hesus? Sa ilang pagpabilin nga sarado, dili abli sa mga bag-ong pagtulun-an ni Kristo kini nahimong dakong babag sa ilang pagdawat sa mga pagtulun-an ni Kristo. Lisod ug dili nila kayang sabton nga sa unsang paagi man si Hesus mao ang pan sa kinabuhi. Ang ilang relasyon usab kang Kristo dili pa hingpit sa ingon nga sila mamahimong andam ihatag ang tanan bisan pa gani ang ilang kinabuhi.

Luyo niining tanan nga mga nagkada-iyang mga rason, adunay mga disipulo nga nagpabilin tungod kay ilang nakita ang wala nakita sa ordinaryong mga disipulo. Gani sa pagpangutana ni Hesus, “Mubiya pod ba kamo kanako?” (Jn.6:67) ug si Pedro miingon nga puno sa pagtuo ug pagsalig kay Hesus, “Ginoo, kinsa may among kapaingnan? Anaa kanimo ang mga pulong nga naghatag og kinabuhing walay katapusan” (Jn.6:68).

Kining maong pagpadayag ni Pedro mao usab ang atong sumbanan isip mga Kristiyano nga sumusunod ni Kristo. Bisan pa man sa mga pagsulay, hagit sa pagtuo ug makapabugnaw sa atong relasyon Kaniya, kita magpabilin nga magmatinud-anon aron mahingpit ang atong relasyon sa Ginoo.

Busa ang hagit kanato karon, mao ang atong hingpit nga pagrelasyon sa atong Ginoo pinaagi sa atong pagkamatinud-anon. Kini usab ang hagit nga gipadayag diha sa ikaduhang pagbasa ngadto sa taga Efeso nga gihulagway ni San Pablo sa usa ka magti-ayon nga ang bana ug asawa mamahimong usa diha sa gugma sa Dios.

Ug sa katapusan kini atong maangkon ug masinati sa atong kinabuhi kung kita magpapabilin sa pagkamatinud-anon sa atong pagpuyo isip mga tinun-an ni Hesus subay usab sa tubag sa atong salmo karon, “Tagamtama ug tan-awa ang kaayo sa Ginoo” (Psalm 34). (Sem. Ruperto P. Jamili)