The Most Sacred Heart of Jesus Parish Calinan

Malipayon ug nagmabungahon ang pagsaulog sa ika 68th Parochial Fiesta sa The Most Sacred Heart of Jesus Parish Calinan, nga nagdala sa tema: “Balaang Kasingkasing ni Jesus, Hagit sa Mapaubsanon ug Malipayong Pagpangalagad” kadtong nilabay nga Agusto 3, 2018. Sa dili pa ang kapistahan aduna usab 9 days Novena Mass sa parokya nga magsugod sa alas 4:30 sa buntag nga gipangulohan sa mga bag-ong pari sa maong parokya. Aduna usab 9 days Novena Mass sa mga piling GKK o Gagmay’ng Kristohanung Katilingban sa matag gabii nga magsugod sa alas 6:30. Sa maong Novena Mass gipangusgan nga madasig ang katawhan sa pagtambong sa Santos nga Misa diin mao kini ang timaan ug sentro sa atong pagtuo.

Ang katapusang Novena mass gipahigayon sa alas 4:00 sa hapon diin ang mumisa mao ang mga pari nga lumolupyo sa maong parokya. Gipangunahan sa bag-ong Obispo sa Diocese sa Mati nga mao si Most Rev. Abel C. Apigo, DD ang pagsaulog sa katapusang Novena Mass ug gikoncelebrahan usab sa mga kaparian sa Calinan. Pagkahuman sa Santos nga Misa gisunod na dayon ang tradisyonal na prosisyon sa imahe sa balaang kasingkasing ni Hesus libot sa tibook publacion sa Calinan nga gitambungan sa daghang katawhan sama sa mga GSL o GKK Servant Leaders, mga Devotee ug mga estudyante sa Holy Cross College of Calinan College Department.

Panahon sa kapistahan adunay upat ka misa, ang First Mass sa 5:00 sa buntag, ang Second Mass sa 6:30 sa buntag, ang Third Mass sa alas 8:00 sa buntag ug Fourth Mass sa 9:30 sa buntag. Sa maong misa gidagsa sa daghang mga tawo ang Third Mass o gitawag nga Pontifical Mass diin ang nangulo sa maong Santos nga Misa mao ang atong pinalangga nga Arsobispo sa Davao nga Mao si Most Rev. Romulo G. Valles, DD ug gikonsilibrahan usab sa mga kaparian sa Vicaryato, relihiyoso nga mga pari ug mga kaubanang pari sa Davao.

Sulod sa maong Santos nga misa pormal pud nga giinstalar ang bag-on Parish Priest sa maong parokya nga mao si Msgr. Maximo M. Sarno, PC ug ang Parochial Vicar nga si Rev. Fr. Jupiter P. Morales. Gipresentar usab atubangan sa Arsobispo sa Davao ang bag-ong membro sa PPC o Parish Pastoral Council, gipresentar usab ang mga GSL o GKK Servant Leaders ug ang katapusan mao ang Parish Staff sa parokya.

Pagkahuman sa Fourth Mass, gisunod na dayon ang PreBap. ug ang Sacramento sa Bunyag diin ang bag-on Parish Priest mao jud ang nangunay sa PreBap. Ug nagbunyag sa 80 ka mga bata. Pagkahapon sa Alas Dos aduna usab kasalan sa Parokya diin Unom ka parisan ang gi kasal ni Msgr. Sarno.

Aduna usab dula ang mga kaparian laban sa Christian Chargers didto sa Calinan Gym. Ug sa maong dula nasungkit sa Davao Clergy ang kadaugan sa score nga 62/61 batok Christian Chargers. Pagkahuman sa ilang friendship game, gisunod na dayon ang Clergy and Religious Night. Ubay-ubay usab nga mga kaparian ug mga madre ang nitambong sa maong celebrasyon lakip na ang mga higala, ug kaparyentihan sa atong mga pari.

Nahuman ang kapistahan nga puno sa kadasig ug gugma sama sa panig-ingnan sa balaan nga kasingkasing ni Hesus diin nga mao ang patron sa katawhan sa Calinan.

Sugod karong ikaduhang semana sa Agusto aduna nay kabag-ohan sa schedule sa mga Misa sa TMSHJP. Sama sa naandan sa matag duminggo magsugod ang 1st Mass sa alas 5:00 sa buntag, ang 2nd Mass sa alas 6:30 sa buntag, 3rd Mass sa alas 8:00, 4th Mass sa alas 9:00 ug pagasundan dayon sa Prebap. ug Bunyag. Nadungagan ug 5th Mass nga magsugod sa alas 4:00 sa hapon ug gitawag kini nga Childrens Mass ug ang 6th Mass nga mao ang Youth Mass nga magsugod sa alas 5:30 sa hapon. Lakip niini nagbuhat usab ug Anticipated Mass sa adlaw sa sabado, nga magsugod sa alas 5:30 sa hapon. Nanghinaot ang atong mga pari dinhi sa Calinan nga pinaagi niining pagmugna ug dugang nga mga misa, matabangan ang katawhan diha sa kalambuan sa ilang spiritual nga panginahanglan ug madasig sa pagtambong sa Santos nga Eucharistiya.

VIVA JESUS! To God be the Glory and Praise!