Gugma sa pag-alagad ang nagtultol sa mga parokyano sa Agdao sa pag-donar og dugo

Labaw pa sa iyang willingness, si Noel Navarro, lay minister sa parokya sa San Antonio de Padua, sa Agdao, miingon nga ang pagtuman sa iyang nakat-onan diha sa pagtulon-an sa pagtoo — ang paghigugma sa uban — mao ang nagtultol kaniya nga mo-donar og dugo diha sa gipahigayon nga Mobile Bloodletting sa St. Mary’s Hall sa buntag niadtong Hulyo otso, Domingo. Uban sa iyang asawa nga si Rose, usa ka katekista, sila kanunay na nga naga-donar sa mga bloodletting sukad niadtong 2010 aron makatabang sa pagsalbar sa kinabuhi.

Multiple donor usab si Janice Galado, miyembro sa pundok sa Adoracion Nocturna ug gift-bearer niining parokya kay sukad niadtong 2016 gikalipay na gayud niya ang iyang pagka-blood donor kay tungod sumala niya nga makatabang siya sa iyang mga ka-parokyano.

Nahimong “way of life” na ni Catalino Mibulos, Parish Coordinator sa mga Pangulo sa Alagad ang iyang pag-donar og dugo. Sumala pa niya nga dili lang sa dinhi nga paagi siya makaalagad sa uban kundili sa daghan pa nga kahigayonan diha sa nagkadaiyang ministriya sa pag-alagad. Dugang niya nga mo-donar gayud siya hangtud sa iyang makaya kay sa matag higayon, siya makabati og kabag-ohan sa iyang pagkatawo, apil na ang kabag-ohan sa sirkulasyon sa iyang dugo.

Miabot si Josel Luzon, usa ka rider sa pundok sa Davao Metro Mix Moto Club kauban ang ilang presidente sa pundok, dili lang sa pagtabang sa pagpahigayon sa maong kalihukan, kundili usab para mahimong blood donors. Anaa na kaniya ang gugma sa pag-alagad kay siya usab miyembro sa usa ka rescue team ang Samal Kabalikat Sibiko.

Si Alice Dolera, katekista, dili blood donor pero ingon niya nga sa kanunay sulod sa siyam ka tuig, siya naga-boluntaryo sa bloodletting aron makatabang sa panginahanglan sa mga Gkk sa iyang parokya. Gikalipay niya sa kanunay ang pagsalmot sa pagtabang sa pagsalbar sa kinabuhi.

Ang programa sa Mobile Bloodletting sa Parokya sa San Antonio de Padua kauban ang Philippine Red Cross ginapahigayon sa matag tuig. Karong tuig 2018, aduna nay tulo ka higayon nga ila kining gipatuman, diha sa bulan sa Enero, Marso ug karong Hulyo. Niining Hulyo, adunay setenta ka blood donors ang natala. (Elena Corazon Mozo)