Katilingbang Espesyalista sa Stigmata Natukod

Natukod ang katilingbang espesyalista sa stigmata, ang St. Francis of Assisi Quasi-Parish sa La Verna Hills Subdivision, Buhangin, Davao City, Setyembre 17.

Sa gihimong kanonikanhong rito sa pagtukod ug sa instalasyon sa unang kura, nga gipangulohan sa Arsobispo sa Davao, Romulo G. Valles, D.D. gikalipay sa mga mulupyo ug ubang mga parokyano ang pagdeklara isip ika-37 nga parokya sa Arkidyosesis sa Davao.

Si Fr. Orlando Angelia, ang kasamtangang director sa Family and Life Apostolate sa Archdiocese of Davao, gipili isip unang kura paroko sa maong quasi-parish.

Ang maong parokya gilangkoban sa 6 ka mga GKK nga kanhing sakop sa St. Joseph the Worker, Sasa apil na ang Laverna, 5 gikan sa Our Mother of Perpetual Help, Bajada, 3 sa San Miguel, Panacan, ug 2 sa St. Mary, Buhangin.

Sa iyang homiliya, giingon ni Abp. Valles nga ang maong adlaw mao usab ang unang kapistahan sa San Francisco De Asis Quasi-Parish, La Verna nga naghandum sa adlaw diin nadawat ni San Francisco ang stigmata o simbolo sa pag-antus ni Hesus.

Ang ilang pyesta gituyo sa paghandum sa pagdawat sa stigmata ug lahi sa mga parokya sa Tagakpan ug Maa nga magsaulog matag Oktubre.

Ang lugar nga La Verna sa Italy espesyal nga lugar alang sa ilang patron, San Francisco de Asis.

Dugang ni Abp. Valles nga anaa ang katawhan niadtong adlawa aron saulogon ang ilang pagtoo isip simbahan ug dili lamang indibidwal.

“Ang nagapaluyo niining tanan mao nga kita usa ka simbahan—struggling, trying to live our faith,” sumala ni Abp. Valles.

Giingon usab niya nga ang pagkahimugso sa parokya sa La Verna usa ka katumanan sa damgo sa mga parokyano ug sa rekomendasyon sa daghang mga pari.

“Ang simbahan mao ang katawhan nga nagpadayag sa pagtoo isip katilingban. Ang tanan matabangan sa pagpuyo sa ilang pagtoo. Inyo na kini. Kung sa una makalikay-likay ta sa atong dako nga classroom (St. Joseph Parish, Sasa) karon maka-participate na ta. Maka-exercise na kita sa atong pagtoo,” sumala ni Archbishop Valles nga gikompara ang usa ka simbahan sa usa ka classroom.

Giingon usab ni Abp. Valles nga usa ka espesyal nga kinaiya sa La Verna mao ang paghatag og garbo sa pagdala sa krus ni Hesus sama nga si San Francisco de Asis nagdala sa kasakit ni Hesus kaniadtong nadawat niya ang stigmata.

Gihagit ni Abp. Valles ang katilingban nga mamahimo gayod nga espesyalista sa stigmata – andam magpasakit uban ni Kristo aron maangkon ang kalipay sa pyesta sa bangkite sa Ginoo. (John Frances C. Fuentes/@dcherald)