Abp. Valles: Pabilin sa pagtoo

Luyo sa kontrobersya nga nasinati karon sa Simbahan mahitungod sa pagkwestiyon sa pagtoo ug sa Bibliya, si Archbishop Romulo Valles mipagawas og sulat circular nga nag-ingon sa mga magtotoo nga magpabilin sa ilang pagtoo.

“Sa kasamtangan, aduna kitay mga nadungog nga mga pamahayag ug komentaryo bahin sa atong pagtoo sa Dios diha sa Simbahan, ug sa atong mga pagtulon-an nga gikan sa Bibliya,” sumala ni Abp. Valles sa iyang sulat niadtong Hunyo 28.

“Nagtoo ako nga kining mga pamahayag ug komentaryo naghatag og kahigwaos, kabalaka, kaguol ug kalibog. Ug alang sa uban, basin kasuko,” dugang niya.

Isip pagtubag sa kasamtangang panghitabo, gi-awhag ni Archbishop Valles ang mga magtotoo nga usa kini ka maayong higayon sa pagbalik tan-aw sa ilang pagtoong Katoliko, “pagtoo nga ato nang nahuptan sa daghang katuigan.”

“Sa kadaghanan kanato, kining maong pagtoo mao na ang pagtoo sa atong mga katigulangan,” sumala sa Obispo.

“Una sa tanan, isip mga matoohong anak sa Dios, atong paningkamotan nga mabatonan ang malinawon ug mahigugmaong diwa diha sa atong kasingkasing taliwala niining tanan. Kini mao ang atong pangayoon sa Dios diha sa atong pag-ampo niining mga adlawa. Kon ania kini sa atong kasingkasing, makabaton usab kita sa gugma ug pagtahod alang sa uban,” sumala niya.

“Mubalik tanaw-aw kita, ug susihon nato ang atong buhing kasinatian sa maong pagtoo sa Dios diha sa Simbahan, ang atong pagtoo kang Jesukristo nga atong manunubos,” dugang niya.

“Ayaw’g kalimti nga kamo mismo nakasinati unsa ka nindot, unsa ka bililhon ug unsa ka gamhanan kining maong pagtoo. Ayaw kalimti ang daghang mga higayon nga diha sa maong pagtoo kamo natandog sa misteryo sa pagsaulog sa Eyukaristiya; diha sa inyong pagkalawat sa lawas ug dugo ni Kristo,” sumala sa Obispo.

Niining mga nilabay’ng mga adlaw, sukad mibuto ang issue sa pagtawag sa Ginoo nga ‘Stupid’, kini pa lang ang higayon nga mipagawas og mensahe ang kasamtangang presidente sa Catholic Bishops’ Conference of the Philippines (CBCP).

“Hinaut pa unta nga magpabilin kita diha sa maong pagtoo, pagtoo nga maghatag sa atong kasingkasing og kalinaw ug kalipay, pagtoo nga pinasikad sa tumang pagsalig sa Dios diha kang Jesus nga kanunay anaa nagauban kanato,” sumala ni Abp. Valles.