Mobile blood donation gipahigayon sa Buhangin Parish

Madasigon nga gisaysay sa Medical Technology (Med Tech) sa Blood Bank Center sa Department of Health nga si Judy Ann Nengasca kang Fr. Dionisio C. Tabiliran, Kura Paroko sa St. Mary of the Perpetual Rosary Parish ang mahitungod sa kasaysayan sa pag mugna sa Mobile Blood Donation (MBD) kon Blood Letting sa Department of Health diin nahimong partner ang parokya sa maong kalihukan. Nakita sa Department of Health-Blood Bank Center nga daku kaayo ang nahimong tabang sa mga parokyano nga nag donar og dugo dili lamang alang sa ilang kaugalingon ug pamilya apan nakatabang usab sila sa ubang miembro sa katilingban nga nahisakop sa parokya sa St. Mary of the Perpetual Rosary Parish. Dugang gipasabot sa maong Med Tech ang mga processo sa mga nagkalain-laing dugo nga gikinahanglan sa mga pasyente. Matod pa ni Fr. Diony nga diha nakita ang misteryo sa pagmugna sa Dios sa kinabuhi sa tawo diin ang dugo dili mapalit sa tindahan kundili kini pinaagi lamang sa pagdonar aron makatabang sa kinabuhi sa uban. Dugo Mo, Kinabuhi Ko! kini usa ka mapadayunong programa sa buhat sa Kalooy sa Parokya ug usa kini sa mga regular nga programa nga nakalatid sa tinuig nga Plano sa Parish Social Action Ministry (PSAM).

Gipahigayon ang MBD sa parokya karong tuiga kaniadtong Domingo, Hunyo 24, 2018 sa alas 6:30 hangtud sa alas 10:30 sa buntag diin mao kini ang ikaduhang beses nga blood letting nga gihimo niining kasamtangang tuig. Matod pa ni Elizabeth Sabucido, MBD parish coordinator adunay 176 ang nagrehistro nga adunay intention nga mo donar apan 153 lamang ang malampuson nga nakuhaan og dugo tungod sa nagkalain-laing hinungdan. Hinayhinay nang nasabtan sa mga parokyano ilabina sa mga donor ang ka importante niini. Ang timailhan mao nga aduna nay mga parokyano nga nakuhaan na og dugo sa siyam (9) ka beses mao nga gitawag na sila nga blood galloners. Aduna napud naka donar na og napulo’g walo (18) ka beses nga mao sila ang two (2) galloners.

Kining maong MBD nagmalampuson tungod sa pakighiusa sa Blood Bank Center sa Department of Health ug sa St. Mary of the Perpetual Rosary Parish pinaagi sa Parish Social Action Ministry nga gipangulohan sa PSAM coordinator, Joel Corage kauban ang mga PSAM core group, PSA volunteers, Caritas ug ubang GKK Servant Leaders ug miembro sa Gagmay’ng Kristohanong Katilingban nga nagvolunteer. (Hermie Mapute, SMPRP SoCCom)