Kapobrehon dili problema kung maningkamot

Dear KNOT,

Ako si ate Thelma.

Ginahiktan namo ang among balay aron dili maanod kung kusog kaayo ang ulan. Daplin man gud sa sapa ang among balay. Nagdako ko sa akong lola. Walay pamilyang nagpadako nako. Walay kaugalingong balay nga gidak-an.

Grade 1 hangtud first year high school nagpa maid ko aron mabuhi. Busa promise nako sa akong kaugalingon nga pagdaku nako, maningkamut jud ko nga magkapamilya, hugtan ang panag-uban ug nga magkabalay. Patindugan jud nako ug tagsa ka balay ang akong mga anak.

Barkada nako si Franco niadtong third year high school mi sa RMC. Maayo kaayo siyang mu-care busa pagligaw niya, human ang 8 ka bulan, ako siyang gisugot. AB English ug AB Filipino ang among mga kurso. Human mugradweyt, nagtudlo siya didto sa Boston, Davao Oriental. Nagminyo dayon mi ug namuyo didto.

Apan tungod kay anad man ko nga magtrabaho sa palengke, wala ko naanad nga walay kwarta adlaw-adlaw. Palangga ko sa akong in-laws pero di ko gusto nga magdepende mi nila. Busa namalik mi dinhi sa Davao ug nagpadayon ko ug pamaligya ug gulay, naningkamut nga mabuhi. Lisud kaayo ang kinabuhi tungod kay wala man dayon nakatrabaho akong bana nya wa sad ko nakagradweyt apan sa akong gipromise, maningkamut ko nga tabangan ang pamilya.

Sama sa ubang magtiayon, miagi pud mi ug krisis. Sa wala pa mi nagserbisyo sa simbahan, ang bisyo ug mga babaeng wala naghuna huna kung minyo ba ang ilang gikaibgan ang rason nganong mag away mi sa akong bana. Pipila nga ako siya gipalayas. Mulayas man sad n’ya mubalik man pud. Ana ko sa akong kaugalingon, pasalamat siya nga babae ang akong anak kay maluoy ko niyang mudako nga wala puy pamilya sama nako. Sayo namatay si papa. Nagminyo dayon si mama. Maong kay lola nako nagpuyo.

Usa ka babaye ug 3 ka lalaki ang gigasa sa Ginoo sa amo. Apan ang tanang kagubot sa balay, hinay hinay nga nahapsay niadtong nagserbisyo nami sa akong bana sa San Pablo Parish. Nahimo siyang PSL sa GKK, PSK, lay minister ug Knights of Columbus member. Ako sad nahimong PSK sa GKK, Treas, ug member sa physical arrangement sa among bag-ong parokya sa OLLP.

Duyog sa akong igsoon nga madre, nagpa miyembro sad mi sa Oblates of St. Benedict (3rd order) diin natabangan mi sa among prayer life pinaagi sa novena ug prayer gatherings. Deboto sad mi sa OMPH. Miabot ang higayon nga nagvolunteer mi nga mag rosary sayo sa buntag sa parokya.

Niadtong Mayo 15 niining tuiga, kapistahan ni San Isidro, gikasal mi usab sa akong bana. Ang among mga anak maoy nag andam sa tanan sa among golden wedding celebration. Naka istambay man ang oxygen tungod kay basig atakihon akong bana nga complicated na ang sakit, apan sa pagkakita niya sa akong mga nanguli nga anak, milagrong wala gyud kato magamit. Mahal gyud ang medication, pero the Lord has provided. Nahurot man sa Bagyong Pablo ang pamana unta namong yuta sa Boston, pero di bale, importante intact among pamilya.

Fifty years nga panag-uban, kapaspas sa panahon. Natuman ang akong mga pangandoy, sa wakas. Aduna nakoy pamilya ug balay. Akong napatukuran ug balay ang tanan nakong mga anak. Ang bonus ni Lord, propesyonal na sila ug kasagaran nasa abroad, plus negosyong gulayan nagpadayon.

I-surrender ang tanan sa Ginoo. Bisan kaming duha karon naa nay diabetes, ug bisan adlaw-adlaw naay naka istambay nga oxygen sa balay, pag ampo gihapon ang among kauban pirmi. In fact, tigpaminaw mi sa morning prayers sa DXGN. Si Lord na ang bahala sa tanan. Ready naman sad ko sa tanang mahitabo; 76 na si Franco, ako 71.

Nakat-on ko magpasaylo tungod sa bisyo sa akong bana. Magpaubos, gi-fight jud nako akong rights isip asawa, bahala ug mulingi pa siya ug pila ka babaye. Ang akong bana, responsable, loving ug caring sa akong mga anak busa ako siyang gimahal.

Dili problema kung unsa ta ka pobre, kung maningkamut lang ta.

Hinaut nga daghan ang lessons nga inyong natun-an sa among istorya.

Nagmamahal,
Nanay Thelma Altizo