“Pagkamaamomahong Pagpangalagad”

Ikanapulo’g unom nga Dominggo sa Ordinaryong Panahon
Jeremias 23:1-6 / Efeso 2:13-18 / Markos 6:30-34

Ingon sa atong pagtuo isip mga kristyano na naa kitay tulo ka “lugar” na padungan kung kita mamatay. Una ang langit, alang sa mga tawong naningkamot sa ilang kinabuhi na mahimog maayong Kristyano. Ika-duha ang purgatorio, alang sa mga tawong naay mga kakulian sa ilang kinabuhi tungod sa ilang tawhanong kahuyang na ilang nahimo samtang sila buhi pa sa kalibutan. Ug ang ika-tulo ang impyerno, alang sa mga tawong nagpasagad sa ilang kinabuhi og nagpuyo og dautan tungod sa ilang mga buhat.

Gina-ingon na ang pikas kinabuhi daw daghang mga kahibulongan! Tinuod na walay maka-ingon kung kinsa ang naa sa Langit, Purgatorio o Impyerno. Klaro ang gi ingon ni propeta Jeremias: “Pagkamakalilisang sa silot sa Ginoo niadtong mga pangulo nga nagpasagad lang nga pamatyon ug patibulaagon ang iyang katawhan! (23:1)” Isip Maayong Magbalantay na sayod ang Ginoo kinaiya nga angay kuptan sa usa ka pangulo diha sa katilingban. Ang maong pagtagad gipakita ni Jesus sa iyang mga tinun-an og sa mga tawong iyang nahimamat matag adlaw. Sa pagkakita ni Jesus sa katawhan naluoy siya kanila. “…kay sama man sila sa mga karnero nga walay magbalantay! (Mk 6:34)” Og sila kitudlaun niya maskin siya mismo walay pahulay og gikapoy. Mao kini ang kinaiya ni Jesus na angay natong pagasundun. Dili lamang kini alang sa mga pari kondili alang kanatong tanan kay kita man gitawag sa Dios sa pagpangalagad. Ang pagpakita og pagtagad sa uban, samut na sa mga nanginahanglan kay para sa tanan mga kristiyano. Ug ipakita nato kini pinaagi sa atong paggahin og panahon sa uban. Mga Ginikanan, naa pa ba kamoy oras sa inyong mga anak? Ang pagtrabaho ba niyo nagpakita og pag-atiman kanila o dili kaya nahimo pa kini og babag na mapalayo mo kanila? Apan dili lamang ang mga ginikanan ang magpakita og pag-amuma, kinahanglang ang mga anak usap magpakita og pagtagad sa ilang mga ginikanan. Mga kabatan-onan, pila ba ka oras ang inyong gigahin sa inyong pamilya? Basi mas daghan pa kamo og panahon sa inyong mga barkada kaysa sa ilaha? Basi ginasayang lang ninyo ang kwarta sa inyong mga ginikanan tungod nagpasagad lang kamo sa inyong pag-tuon. Og alang kanatong tanan nga na nangulo sa Simbahan, wala na kitay lain na maihatag sa Ginoo kondili ang atong pagkamatinuod-anon sa atong bokasyon isip sumusunod ni Kristo.

Ang Ginoo nagtawag kanato sa pagkamaamomahong pagpangalagad. Og tungod niini gipakitaan kita niya’g sumbanan nga angay natong pagasundon aron kita usab makasulod didto sa iyang gingharian – Ang Langit! (Fr. Matt Bernard Quiao)