Ablihi ang imong kasingkasing!

Nakasinati na ba kamo sa mga tawong sa kanunay dali rang mohukom ug dali ra usab magpihig-pihig sa ilang isigkatawo? Unsa may inyong bation kon kita na mismo ang nahimong hingtungdan sa mga binuhatan, niining matang nga mga tawo?

Ang atong ebanghelyo karong adlawa nagpadayag kanato sa kamatuoran kon unsa ang naka-babag sa mga taga Nazareth sa ilang pagtuo kang Jesus. Kini mao ang ilang nag-kahiusang pagkamapahitas-on sa panghunahuna, pagpihig-pihig ug hinanaling paghukom. Unsa may ilang daling gihukman? Nga si Jesus usa lamang ka ilang ka tagi-lungsod ug ilang kaila kayo ang iyang mga ginikanan nga mga kabus nga pamilya. Dili nila madawat nga ang usa ka karpentero, mamahimong magsasangyaw. Luyo niining tanan si Jesus sa daklit nga higayon nagtudlo kanila kon unsaon pagbag-o sa ilang panghunahuna. Ang Kahayag nga dala ni Jesus mao ang molamdag kanila sa hustong dalan paingon sa ilang tinuod nga kalipay. Apan kawang lamang ang tanan kay wala sila motuo kaniya, nagpadayon sila sa ilang pagduda ug hinanaling paghukom. Ang pagka halip-ot sa ilang panghunahuna naghimo kang Jesus nga usa ka binilanggo diin ang iyang langitnong gahum, nahiktan ug dili makalihok diha sa ilang kinabuhi.

Matun-an nato ning atong ebanghelyo mao ang paghangyo sa Espiritu Santo nga sa kanunay unta abli ang atong panghunahuna sa mga lamdag nga gihatag sa Pulong sa Dios. Tungod kay bisan aduna kitay mga kahuyang sama sa pagka-mapahitas-on, pagpihig-pihig ug hinanaling paghukom, mahimo pa gihapon kitang malamdagan og mabag-o kay miingon ang Ginoo kang San Pablo: “Igo kanimo ang akong grasya, kay sa imong kahuyang, makita sa hingpit ang akong gahum.” Sa laing pagkasulti, ang grasya sa Dios, andam sa kanunay nga molamdag kanato, bisan kon kita adunay daghan ug dagkung sala, kon kita adunay abli og andam ang atong kasingkasing sa pagdawat sa imbitasyon ni Jesus sa pagsunod sa iyang mga gitudlo. Anaa ang Balaang Bibliya, ang mga pagtulun-an sa Simbahan, ang mga Sakramento, nga mga instrumento, aron madawat nato ang iyang kaluoy ug kita makabalik ngadto Kaniya. Andam na ba kita? Ayaw usiki ang panahon kay matag takna bulawanon, matud pa sa usa ka awit. Amen. (Sr. Rica G. Dalaguit, fsp)