Bp. Dael gi-ordinahan

Napuno sa emosyon ang nahimong ordinasyon ni Bishop Raul Dael niadtong Hunyo 7, 2018 sa San Nicholas de Tolentino Cathedral, Cagayan de Oro City.

Sa wala pa man gisugdan ang ordinasyon, seryoso nga nag-ampo si Bishop Dael atubangan sa emahen ni Jesu Kristo sa usa ka lawak nga naa sa kilid sa maong Cathedral.

Sa pag-abot ni Luis Antonio Cardinal Tagle, Archbishop sa Archdiocese sa Manila, mao ang Principal Consecrator sa ordinasyon, Archbishop Antonio Ledesma, Metropolitan Archbishop sa Archdiocese sa Cagayan de Oro, ug si Bishop Emeritus Nereo Odchimar, ang hulipan ni Bishop Dael sa Diocese sa Tandag, daling nag-gakos ang mga Obispo ug wala gayud nila mapugngi ang pagtulo sa ilang mga luha.

Atol sa homiliya ni Cardinal Tagle sa ordinasyon, iyang gipahimangnuan si Bishop Dael nga dili kini molayo sa misyon ni Jesus, dugang sa iyang pahimangno nga dili kini magbuot-buot ug iyang kaugalingon nga misyon.

Sumala pa nga nasayod ang Cardinal nga adunay katakus sa misyon si Bishop Dael apan aduna nay nag-una kanila sa misyon mao si Jesu Kristo ug mas maayong mosubay na lamang Kaniya.

Nagpasalamat sab ang Cardinal sa pamilya ni Bishop Dael, ilabina sa iyang mga ginikanan tungod gitugutan kini nga magserbisyo sa simbahan isip pari ug isip Obispo.

Samtang atol sa pagpasalamat ni Bishop Dael sa katawhan, subli usab siyang nahimong emosyonal, ilabina nga dako siyag pagpasalamat sa iyang Arsobispo tungod anaa kini pirmi sa iyang kiliran ug nahimo kaniya ug amahan diha sa pagpangalagad, lakip nga gipasalamatan ni Bishop Dael ang kaparian sa Archdiocese sa Cagayan de Oro tungod sa ilang suporta kaniya, gani ang usa ka buwan nga allowance sa kaparian ilang gihalad alang sa galastuhon sa ordinasyon.

Samtang mipaambit si Bishop Dael, nga kaniadtong bata pa siya, matag saulog niya sa iyang adlawng natawhan, sayo pa lang sa kabuntagon, pukawon na siya sa iyang inahan, ug tagaan siya ug sinko pesos, mamalit gilayon siya ug init nga pandesal, bahin-bahinon kini sa iyang inahan ug isulod ug plato, iyaha dayon kining ipang-apod-apod sa kabos niya nga mga silingan. Wala damha sa iyang inahan nga nagtudlo kaniya nga mag-apod-apod sa pan, nga sa umaabot nga panahon mamahimo siya sa pag-apod-apod sa pan mao ang Lawas ni Kristo.

Samtang pagkahuman gilayun sa ordinasyon, midiretso na si Bishop Dael sa Gaston Park, nga anaa tapad sa Cathedral, ug didto kini nakigsalo sa pagkaon sa usa ka street child.

Una pa man kini mikaon, gisiguro usa sa Obispo nga makakaon ang liboang katawhan nga anaa sa gawas sa Cathedral.

Nahibaloan nga si Bishop Raul Dael, gipanganak niadtong Oktubre 10, 1966 sa Kimaya Jasaan, Misamis Oriental, ika-unom sa pito ka mga anak ni Victor Dael ug Gertrudes Bautista; sa edad nga 27 hi-ordinahan sa pagkapari niadtong Hunyo 7, 1993. Insaktong 25 ka tuig na ang milabay sa dihang siya gi-ordinahan sa pagkaparo, sa lugar hain didto sab siya gi-ordinahan pagka-Obispo.