GKK sa Wangan nagsaulog sa ika-68 nga kapistahan

Malipayong gisaulog sa mga pangulo ug sa Kristohanong Katilingban ang ika-saysentay otso (68) nga kapistahan sa patron nga mao si Immaculate Heart of Mary, Barangay Wangan, Poblacion sa Calinan ning siyudad sa Dabaw, niadtong adlawang biyernes, bulan sa Hunyo petsa 8 tuig 2018. Uban sa Tema: “Birheng Maria, timubdan sa kaputli ug sumbanan sa pagkamapahiubsanon.”

Ang Santos nga Eyukaristiya nagsugod sa alas nuybe sa kabuntagon nga gipangulohan ni Reberendo Padre Jupiter Morales D.C.D. Siya mao ang Pari nga bag-ong destino sa parokya isip Vicar.

Sa iyang homiliya gipasabot niya nga ang ikaduhang biyernes sa Hunyo mao ang Solemnidad sa Sagrado nga kasing-kasing ni Hesus ug miingon siya nga mao duol lang ang kapistahan sa Sagrado Corazon ni Hesus ug Putli nga kasing-kasing ni Maria kay tungod sa intensive connection o duol nga relasyon. Si Maria nahimong putli ug walay salang panulundon o sa pinulongang latin “Sempecado” nahimo siyang putli kay tungod gia-andam siya sa Dios alang sa talagsaong grasya. Alang sa pag-andam sa iyang role nga magsabak sa manluluwas nga mao si Kristo kansang kasing puno sa kalooy Ug gugma.

Ang sugid pa ni Padre ang sikat na icon sa Sacred Heart of Jesus mao ang nigawas na kasing-kasing ni Hesus, simbolo sa walay kamatayon, walay katapusan nga gugma ug dili matukib na kaayo. Naghatag usab ug pagpasigarbo si padre sa katilingban nga kay ika-68 naman ka kapistahan ing-ani napud kalig-on ug kadugay ang atong pagtoo ug pagdesbosyon diha sa Mahal nga Birheng Maria.

Ang pahinumdum usab ni padre nga dili lang ta kutob ka Maria pinaagi sa pag-ampo diha sa Rosaryo, mga Novena ug pagdebosyon kinahanglan nga ang atong mga pag-ampo mulatas ug malagbas kana ngadto sa Mahal nga Kasing-kasing ni Hesus. Ato usab hinumduman nga kita nakapunting sa kinabuhi ni Hesus ug si Maria ubos lamang nga sulugoon sa Dios. Apan ang iyang kaputli ug magkamasinugtanon talagsaon kini nga grasya sama sa pulong ni Isabel ngadto kaniya “Bulahan ikaw sa babaye nga tanan”.

Panghinaot ni Padre nga magmalig-on pa unta pag-ayo ang atong pagtoo sa Dios pinaagi sa pangaliya sa Birheng Maria sa Inahanong pagpangga. Arun atong masinati ang Amahan, dili lang siya ordinaryo kundili siya mapinanggaon, mapasayloan ug puno sa Kaayo.

Panapos sa Homiliya ni Padre Morales mao nga kitang mga ginikanan masakitan atong mga anak halos pakamatyan pa. Apan si Maria lahi siya kalma apan siya naghilak kay ang kasakit ni Hesus sa iya minglapus. Si Maria nagmasinugtanon sa mando sa Amahan, gihalad niya ang kaugalingon niya anak alang sa pagbayad sa Kasal-anan sa katawhan tungod usab sa iyang mapailubong gugma. Hagit sab niya sa katawhan na pahugtan pa ang pagdebosyon sa Mahal nga Birheng Maria arun pinaagi kang Maria kita magmahingpiton ngadto sa Dios.

Pagkahuman sa Misa nagpista na sa lamesa uban ang katilingban Ug tanang pangulo sa nagkalain-laing GKK arun makigduyog sa kapistahan.

Iyahay ang tagbalay sa pagmaya. Pagkagabii takanang alas otso naay programa gipahigayon ang mga kabatan-onan mao ang Parlor Games alang sa mga kabataan nagmugna ang IHM YOUTH GROUP ug napulo ka dula. Ang matag dula nagkadaiya ug naay in-cash na mga papremyo. Malipayon sila nga nagdula ug midawat sa ilang mga papremyo.

Ang mga pangulo ug mga ginikanan maaabtikon nga misuporta usab sa ilang mga anak. Nahimong mabulokon ug malinawon ang maong kapistahan sa Birheng Maria. Sa Tema gihagit kita na magpakaputli nga likayan ang pagpakasala ug mapaubos sa tanang higayon sa atong kinabuhi. Kita magpadayon nga magmalig-on sa debosyon kang Maria arun mahiduol kita sa Mahal nga Hesus. (Jhunryl Bonghanoy)