Sa simple nga selebrasyon natuman ang gihandum nga kapistahan!

Tuig 2017 gisugdan sa mga parokyano sa San Antonio de Padua Parish, sa Agdao, niining siyudad, ang ilang pagpangandam alang sa ika-55 nga kapistahan sa ilang patron karong tuiga.

Apan ang ilang pagpangandam wala diha sa panggawas o garbo nga pasundayag sa pagpangandam kundili sa paghatag og bili sa ilang relasyon kay San Antonio de Padua ug sa usa’g-usa.

Niadtong bulan sa Enero sa niaging tuig gisugdan ni San Antonio de Padua ang iyang paglawig diha sa setenta-i-otso ka mga GKK sa parokya. Sa matag semana nga didto ang imahe ni San Antonio sa ilang mga kapilya, ang mga parokyano mihangop gayud sa iyang pagbisita. Matag gabii sila mihalad sa ilang mga pag-ampo sa novena alang kay San Antonio de Padua ug Santos nga Misa aron sa pagtapos sa iyang pagbisita diha sa matag sona. Gi-procession nila ang imahe gikan sa usa ka GKK padulong sa sunod nga GKK. Ilang gisubay ang kinabuhi ug mga milagro ni San Antonio de Padua pinaagi sa pagkanta sa GOZOS samtang sila nagabaktas. Ang mga hamtong ug kabataan nagkahiusa diha sa paghalad sa ilang pagpasalamat sa ilang patron. Ug sa ilang pag-ampo sila miingon, San Antonio de Padua, ig-ampo mo kami.

Niining Hunyo uno, atol sa unang adlaw sa paglingkod sa ilang bag-o nga kura paroko, Reberendo Padre Amado Arroyo ug Parish Vicar, Reberendo Padre Nestor Dalumpines, gisugdan ang unang adlaw sa novena alang sa kapistahan ni San Antonio diha sa ilang Simbahan. Maong dako ang kalipay ni Padre Dalumpines kay ang iyang unang adlaw sa parokya mao usab ang unang adlaw sa novena ug unang Biyernes sa bulan. Siya miingon nga “sugdan nato ang unang novena sa kalinaw sa kasingkasing, kay sa kalinaw mahimo kitang tinuod nga mahigugmaon. Ang mahigugmaon nga tawo adunay paglaum, kalipay ug kadasig.”

Sulod sa siyam ka adlaw miabot ang mga parokyano alang sa paghalad sa ilang mga katuyoan diha kay San Antonio pinaagi sa ilang mga pag-ampo. Ang matag sona, sona uno hangtod nuwebe, adunay adlaw kung diin sila ang mohalad sa ilang mga halad pasalamat. Sa katapusang adlaw sa novena, niadtong Hunyo nuwebe, gipahigayon nila ang pag-procession sa ilang mahal nga patron diha sa kadalanan kauban ang ilang kura paroko. Miatubang pa sa iyang mga parokyano si Padre Arroyo paghuman sa procession dili lamang sa paghatag sa iyang bendisyon kanila kundili usab sa pagpasalamat kay San Antonio de Padua sa iyang pagtabang kanila sa paglahutay sa paghimo sa procession, sa paghatag sa maayong panahon ug pagpahilayo kanila sa mga kakulian. “Gikan sa Simbahan, nibalik ta sa Simbahan,” ingon ni Padre Arroyo.

Nianang gabhiona usab mihatag og kasadya ug kalipay ang mga kabataan sa parokya pinaagi sa ilang mga pasundayag sa Youth Night diha sa Holy Cross of Agdao Gym. Nakig-sadya ang mga lideres sa nagkalain-laing GKK agi’g suporta sa ilang mga kabataan nga mi-“effort” gayud sa ilang mga presentasyon. Miduyog usab kanila ang ilang kura paroko. Apan, dili hikalimtan nga mialagad ang mga lideres ug miyembro sa Gkk pinaagi sa ilang pagpanglimpiyo sa sulod ug gawas sa Simbahan ug sa Pastoral Building, tibuok adlaw niadtong Huwebes ug nianang Biyernes sa hapon.

Malipayong fiesta na gayud! Si Arsobispo Romulo G. Valles sa Arkidayosis sa Davao miabot ug misaulog sa Santos nga Misa sa alas otso sa buntag. Napuno ang Simbahan! Ug tungod niini nadungog sa katawhan ang mensahe sa Maayong Balita nga ang “ atong pagtoo mogula diha sa atong pagka-masaligon sa Ginoo, nga dili nato makalimtan ang atong kakayahan kung kita adunay pagsalig sa Dios, “nga dili mawala ang atong kinabuhi kung connected kita sa Ginoo, ang Dios nga nagbanhaw kang Jesus, nagbanhaw usab kanato maong magsige kita sa pag-simba, nga bisan wala tay gana, manimba kita.” Midugang si Arsobispo Valles sa pag-ingon nga, “ayaw kawad-i sa kasibot, sa gana. Tuhoi ang “riches” sa Ginoo. Igsoon kitang tanan, kita nga nagatuman sa kabubut-on sa Dios.”

Miabot usab sila Padre Eliseo Navarro, Padre Oscar Enjaynes, Msgr. Leonardo Vicente ug Padre Toto Espaῆa ug Padre Don Silvosa, kanhing kura paroko ug Parish Vicar niining parokya aron sa pagsaulog sa mga Santos nga Misa.

Miadto ang mga parokyano nga namyesta sa St. Mary’s Hall para sa ilang “packed lunch” nga giandam sa mga GKK ug lay organizations pinaagi sa ilang 100 ug 200 pesos nga kontribusyon. Ang ubang mga bisita misaka didto sa second ug third floor sa Pastoral Building. Silang tanan nakighiusa diha sa pagsalo sa pagkaon ug pag-istoryahanay.

Unsa ang kaha ang ilang giampo? Unsa kaha ang ilang gipaabot nga mensahe gikan ni San Antonio de Padua karon sa iyang kapistahan?

Nga bisan sa ka-yano sa selebrasyon sa kapistahan matagamtaman unta nila ang tinuod nga kalipay, kalinaw ug paglaum tungod sa pakighiusa sa ilang patron ug sa usa’g usa ug nga kini nga kahimtang sa ilang mga kasingkasing molungtad sa matag adlaw sa ilang kinabuhi. (Elena Corazon Mozo)