Ang Pamaagi sa Ginoo

Ikanapulog-Tulo nga Dominggo sa Ordinaryong Panahon
Ws. 1:13-15 / Ps. 30:2,4,5-6,11,12,13 / 2 Cor. 8:7,9,13-15 / Mk. 5:21-43

Naa koy kaila nga pari nga ang iyang Mama gi tagaan na sa mga Doctor ug taning sa kinabuhi ug pila nalang ka bulan mamatay na ang iyang mama tungod sa sakit nga kanser. Sa iyang bahin isip usa ka pari wala siya na wad-an ug paglaom, matod pa niya kung nabuhat na tanan sa Doctor sa mga tambal nga paagi siya padayon gihapon sa pag tambal sa iyang Mama sa ispritual nga pamaagi. Tuod man sa pila ka bulan ang milabay ug pila na katuig ang milabay ug hangtod karon buhi gihapon ang iyang Mama ug wala katoo ang mga Doctor sa nahitabo.

Diha sa atong kinabuhi usahay makasinati kita ug mga kalisod o mga problema apan ang atong kapasidad sa pag-atubang ni ining mga kalisod ug problema sa kinabuhi limitado lamang, usahay mawad-an kita ug gana, mawad-an kita ug pagla-om ug mag kalisod kita sa pag pangita ug sulosyon.

Ang atong Ebanghelyo karon nagpahinumdom kanato nga diha sa pag-atubang nato sa matag problema, ayaw kalimti nga ang Diyos andam kanunay nga maminaw niining mga problema nato. Ang Diyos kabalo kung unsa ang atong mga kinahanglan, and Diyos nagbantay ug naminaw kanato. Anaa kanato ang panigkamut nga mu duol sa Diyos ug mangayo ug tabang.

Atong madunggan diha sa ebanghelyo nga si Jairus miduol kang Hesus ug miingon, “Ang akong batang babaye himalatyon. Adtoa ug itapion ang imong mga kamot diha kaniya, aron mamaayo ug mabuhi siya.” (MK 5:23)

Sa pagduol ni Jairus tungod sa iyang pagtuo kang Jesus nga mamaayo ang iyang anak natuman tungod sa iyang pagtuo. Si Hesus gi ingnaan lamang ang bata “Talita, cumi”; nga sa ato pa, “Inday, magaingon ako kanimo, bumangon ka.” ug mi bangon ang bata ug naglakaw ug wala sila katoo.

Diha sa pagmando ni Hesus nagpahinumdum kanato nga ang Ginoo nag sampit ug nagmando pud kanato sa pagduol kaniya. Ayaw kalimot sa pag-ampo kanunay. Duol sa Diyos kay siya naay dakong sulosyon nga ihatag kanimo diha sa pag atubang sa matag problema.

Atong hinumduman nga ang pamaagi sa tao limitado lamang apan ang pamaagi sa Ginoo walay imposible nga dili mahitabo. (Mark Joy G. Basallajes, OFM)