EMHC 1st Convention gipahigayon

Gipasalamatan ni Catholic Bishops Conference of the Philippines President Davao Archbishop Romulo Valles ang mga Extraordinary Ministers of Holy Communion sa ilang nahimong pagserbisyo sa simbahan pinaagi sa pag-alagad diha sa bangkete sa kaluwasan.

Ang pagpasalamat sa Arsobispo, atol sa gipahigayong 1st Extraordinary Ministers of Holy Communion sa Archdiocese sa Davao, nga gipangulohan sa Archdiocesan Liturgical Center, niadtong petsa dos sa Hunyo 2018, Remase Gym Catalunan Grande, Davao City.

Ang maong aktibidad gisalmutan sa mikabat kapin kon kulang 2,300 ka mga lay ministers nga naggikan sa nagkadaiyang parokya sa Archdiocese sa Davao.

Gi-awhag sa arsobispo ang mga lay minister nga mamahimong madasigun kanunay sa pagpangalagad, kansang mao usab kini ang makapadasig sa uban ilabi na ngadto sa mga naluya sa ilang pagtoo ug pagserbisyo.

Aminado ang arsobispo nga ang presensya sa mga lay minister dako usab ug tabang sa pagkamadasigun sa mga kaparian ug mga Obispo sa pagpangalagad sa pagtuman sa kabubot-on sa Dios.

Sugang awhag sab ni Archbishop Valles nga ang mga Extraordinary Ministers of Holy Communion nga kung anaa na panahon sa pagserbisyo, ipabilin kanunay ang pagkasolemnidad sa pagkamisteryo sa grasya sa pagserbisyo, sumala pa nga nakalakip na niini ang solemnidad sa dagway, bayhon, linakwan ug sa ilang mga mata.

Samtang gipasabot sa arsobispo nga ang ilang pagserbisyo sa bangkete sa kaluwasan, dili kini buot-buot nga katungdanan, tungod mao kini ang gasa sa labawng makagagahumkanila isip pagtugot sa pagserbisyo sa iyang katawhan.