14th Sacerdotal Anniversary ug Despedida Party ni Fr. Jojo gipahigayon

Sa San Roque Parish Malabog niadtong June 1, 2018, gibati og kalipay kay nagmalahutayon gihapon siya sa iyang pagkapari sulod sa 14 ka tuig ug mibati usab og kaguol kay mobiya na siya ug mobalhin sa laing parokya para mapadayon ang iyang pag panerbisyo isip pari.

Daghan ang mga bisita nga gikan sa nagkalainlaing parokya ug mga GKK’s sa nagkalainlaing sona aron makisaulog sa anibersayo sa iyang pagka pari.

Sumala sa iyang homiliya diha sa Santos nga Misa, ang 5 ka tuig sa pagpangalagad daghan mga pagsulay ang atong maaigian, giasoy pa niya ang iyang kaagi una siya nahimong pari. Maong aduna syay hagit sa mga Pangulo kaning lima ka tuig ang pinakalisod nga agian sa mga ministriya. Giingon pa niya ang inyong gasa ipaambit diha sa pagpangalagad labi na sa simbahan kay diha ta na umol. Kay ang simbahan motan-aw sa sitwasyon sa katilingban kung unsa ang gikinahanglan. Mao pud kini ang iyang gisunod sumala sa giingon ni Pope Francis nga ihatag ang mga sakramento sa katawhan. Gani naopen niya ang duha ka GKK sa mga lagyong dapit sama sa sitio Nursery ug Sitio Salag aron mahatag ang mga sakramento nga ilang gikinahanglan sa ilang lugar.

Ang barangay ug simbahan nagkialayong maong namugna ang libreng kasalan sa Parokya. Dapat masabtan sa mga pari ang pastoral aspect diin ang programa sa simbahan mahatag pinaagi sa norms and guidelines.

Nagpasalamat si Fr. Jojo una sa Ginoo, sa iyang Nanay maskin wala na sa kalibotan pero siya ang hinongdan nga nahimo siyang pari, kay kapitan Jessie Areja, sa Paquibato Pulis, tanang mga Pangulo, sa mga parokyano nga naka serbisyo siya sulod sa lima katuig ug kaning San Roque Parish, Malabog ang unang simbahan nga nahimo siyang kura paroko, sumala pa niya, “first love never dies.” Dili gayod niya malimtan ang Malabog.

Human sa misa adunay programa sa likod sa simbahan ug nagsalosalo dayon. Adunay tribute para ka Fr. Jojo ang mga pangulo sa matag ministriya ug mao kini ang wala nakapugong sa mga luha tungod sa taas nga panahon sa ilang panaguban. “Padre salamat kaayo. Padre salamat. Padre dili ka namo mahikalimtan. Padre biyaan na gayod nimo mi. Ingat Padre ug God bless.” Mao kana ang mga pulong nga gikan sa mga pangulo ug mga batan-on nga madungog sa among kura paroko. Sa sekreto wala pod nakapugong sa pagtulo sa iyang mga luha. (Imelda Overiz)