Ang dagkong mga butang nagagikan sa gamay nga sinugdanan

Ikanapulog-usa nga Dominggo sa Ordinaryong Panahon
Ez 17:22-24 / Ps 92:2-3, 13-14, 15-16 / 2 Cor 5:6-10 / Mk 4:26-34

Duha ka sambingay ang gi sugilon ni Hesus karon sa atong Ebanghelyo. Ang sambingay mahitungod sa pagtubo sa binhi ug ang sambingay mahitungod sa liso sa mustasa.

Unsa man ang sambingay?

Sa laktod nga pagkasulti ang sambingay usa ka pamaagi ni Hesus sa pagsaysay ug istorya sa sayon nga paagi mahitungod sa paghari sa Diyos aron masabtan sa iyang mga tigpaminaw.

Si Hesus usa gayod nga maayong magtutudlo, nindot pamalandungan ang iyang mga gipangsulti diha sa atong Ebanghelyo karon. Duha ka sambingay ang naay pagka pareho, ug mao ang gamay kaayo nga liso ug kung mutubo dako kaayo.

Ang Ebanghelyo nato karon nag pahinumdom sa usa ka butang: nga ang tanang dagkong butang nag sugod sa pinakagamay’ng butang (big things come from small beginnings).

Usa ka simple nga example o pahinumdom para kanato nga ang atong kinabuhi kitang tanan ug sigurado ako nga kita nagsugod sa pagkagamay apan kining kinabuhi-a dili magpermanente kay ang atong kinabuhi naga padayon sa pagtubo, dili kita magpabilin nga bata pirmi ug kana ang gitawag nga balaod sa kinabuhi nga dili kita pwede mag permanente kung unsa kita ang tanan adunay panahon sa pagbag-o ug sa paglambo man.

Bisan unsa pa man ang kahimtang sa atong kinabuhi ang gamay’ng butang nga atong mabuhat diha sa atong paglambo ug pagbag-o kini mamahimong dako sa mata sa Ginoo kay sa mata sa Ginoo importante kitang tanan ug espesyal kita para Kaniya.

Ug diha sa atong kinabuhi nga gigasa kanato sa atong Ginoong Diyos ato unta ihatag ang tanang paningkamot nga kita mutubo ug dako nga maayo ug dako sa gugma. Ug makontento usab kita kung unsa ang iyang gihatag o ihatag kanato kay kitang tanan nagtubo tungod sa grasya sa Ginoo.

Diha sa atong padayon nga pagtubo dili lang unta ang atong lawas ang mutubo, mutubo usab unta ang atong pagtuo sa atong Ginoo. (Mark Joy G. Basallajes)