Pro-life Center sa Dabaw gi-buksan na

Niadtong Sabado, Mayo 18, 2013, gibuksan ang bag-ong Natural Family Planning ug Pro-life Center sa Archdiocese sa Davao. Gisugdan ang launching activity sa usa ka Misa ni Archbishop Romulo G. Valles didto sa Sacred Heart Parish church (Obrero), dayon nag-motorcade ang Family & Life Workers sa pagpangulo ni Abp. Valles ug ni Fr. Orlando Angelia gikan sa Obrero padulong sa Santa Ana parish, milibot sa downtown ug gitapos didto sa bag-ong NFP/PRO-LIFE Center nga nahimutang sa Fatima St. duol sa kanto sa Jacinto St.

Gisunod gilayon ang pagputol sa ribbon isip pagbukas sa buhatan sa Family & Life Apostolate nga nahimutang sa ubos sa maong gambalay. Dayon misunod ang panalangin o blessing sa maong opisina ug sa Function Room nga nahimutang sa ika-5 nga andana sa gambalay. Si Archbp. Romulo Valles mismo ang nag-blessing ug gitambongan kini sa mga FLA Parish Coordinators, pipila ka sakop sa mga grupo ubos sa ACLAIM ug mga miyembro sa FLA Archdiocesan core group.

Sa iyang homiliya sa misa, gidasig ni Abp. Valles ang mga Family & Life Workers sa pagpadayon sa mga buluhaton ug sa pagpakigbisog alang sa pamilya ug kinabuhi, luyo sa kaparotan sa pagpugong sa pagpasa sa RH Law. Sumala niya, daghan pa ang mga buluhaton mahitungod sa pamilya ug kinabuhi ug usa lamang ka bahin ang atong pakigbisog batok sa RH.

Mas importante ang atong padayon nga pagtanyag sa Natural Family Planning. Kinahanglan nga atong mapakita sa katawhan nga ang atong gibaligya nga Natural Family Planning masabtan ug makatabang gayud kanila, ug dili kini mga pulong lamang. Kinahanglan ang hiniusa ug matinud-anong pagduso ug pagpakaylap sa pamaagi sa NFP-BOM.

Subay niining maong katuyuan, gilauman Abp. Valles ang pagtabang sa mga kura paroko sa paghimo ug kaugalingong NFP/Pro-life ug Counselling Center sa ilang parokya aron mapalapnag ang hustong pamaagi sa NFP-BOM ngadto sa mga nasakopan sa mga GKK, pinaagi sa mga nabansay ug hanas nga mga magtutudlo sa pamaagi sa Billings Ovulation Method. Sugod karong Sabado ug Domingo, Mayo 25 ug 26, magpahigayon og NFP-BOM Trainors Training sa maong Center. Aduna pay laing hut-ong sa pagbansay sa June 1 & 2, 2013 ug gilauman nga ang mga parokya magpadala sa ilang mga trainees.

Ang pundok sa Family & Life Workers, pinaagi kang Fr. Orly Angelia, nagpasalamat kang Msgr. Paul Cuison, sa iyang kinasingkasing nga tabang aron mapahigayon ang pagmugna sa maong NFP/Pro-life Center. Ang maong center, gawas nga adunay airconditioned nga function room ug Counselling Room, aduna usa’y Library ug Resource Center diin pagatapokon ang mga Modules ug References sa lain-laing Seminars kalabot sa Family & Life lakip ang mahitungod sa “Teen Sexuality” ug “Christian Parenting”.

Alang sa mga interesado, lakip ang magpatangtang sa IUD, makigkita lamang kang Ms. Lilia Aventurado didto sa maong Center o mokontak sa mosunod nga mga numero:

By Carlos Dante Bontia/Contributor