Parish GKK Day gisaulog

Malipayon ang mga parokyano sa St. Mary of the Perpetual Rosary Parish diin gisaulog ang ika-31 ka tuig nga kasumaran sa pagtukod sa parokya niadtong petsa 27 sa bulan sa Mayo 2018. Ang tema karong tuig sa kasaulogan: “St. Mary of the Perpetual Rosary Parish, padayon sa pagbati sa buhat sa Dios diha sa pag-alagad sa mga kabus.” Gisugdan ang maong aktibidades sa usa ka Santos nga Misa ug gisunod dayon sa mga batan-on ang parlor games hangtud sa alas dos sa hapon. Pagkahuman sa parlor games gisugdan ang programa sa Santa Cruzan nga gipangunahan sa PSK Coordinators. Gitawag ang mga pangalan niini ug ang titulo nga iyang gi-representar ug ang simbolo sa matag Reyna apil usab ang ilang mga konsorte ug constantino ug ang pangalan sa GKK diin sila nagagikan. Malipayon ug mapasalamaton ang GKK Birhen sa Fatima sa Emily Homes, Cabantian, Zone 2 nga ang ilang kandidata nga si ROSE EVE DANELE AMPET ang nahimong Reyna Elena, ug si FRANCIS CARL AMPER ang nahimong Constantino-I. Padayon ang maong programa apan ang nakapatandog og dako sa mga kasingkasing sa mga parokyano mao ang pag anunsiyo ni FR. JESS SAMANIEGO, DD ang kasamtangang Kura Paroko nga hangtud May 31, 2018 na lang siya. Adunay morag na-shock ug kahilakon sa pagtan aw sa ilang mga nawong. Nadugangan og samot ang kamingaw sa mga parokyano ug ni Fr. Jess mismo kay gihalaran siya og usa ka action song sa mga PSP o katekista ug chorus sa mga PSK. Gihuman ang programa sa pag awit sa “O Maria Rayna sa Pilipinas” isip pahinungod sa Patron, Sta. Maria sa Kanunay’ng Pagrosaryo. (Edith C. Ibañez, PSK Secretary | Photos: Norie Santillan)