3rd Kadaugan Festival sa Talicud Island

Emosyonal ang myembro sa Sta. Cruz District B, human nga sila ang gideklara nga midaug isip first place sa gipahigayong 3rd Kadaugan Festival, usa ka aktibidad nga gisalmutan sa mga parokyano nga may kabahin sa pagsayaw ug ipakita ang ilang panginabuhian, pianaagi sa pagsayaw, kon indak-indak, isip kabahin sa ikaduhang kapistahan sa Sta. Cruz Parish Talicud Island, Kaputian District, Island Garden City of Samal. Ang maong aktibidad gipahigayon sa Sta. Cruz Elementary School.

Sumala ni Elizabeth Natad, elder sa Sta. Cruz District B nga nadungog gyud ang ilang pag-ampo nga makuha ang maong ganti, ug nagmabungahon ang ilang mga nahimong kahago sulod sa usa ka semana nga pagbansay, ingon man daghan gayud sila ug mga nahimong sakripisyo aron sa pagsalmot sa maong aktibidad, ilabina nga ang ilang kabataan, bisan ug mag ulan nagmadasigon nga pagatun-an ang ilang stepping.

Gibutyag ni John Blandy Robles, coordinator sa maong aktibidad, nga ang tema niini, may kalambigitan sa pagtoo sa mga residente sa Talicud ngadto sa balaang krus.

Sumala pa nga gipakita niini pinaagi sa pagsayaw sa mga partisipante nga unsa ka milagroso ang balaang krus ngadto sa mga mag-uuma sa lubi, ilabina nga adunay panahon kaniadto nga nangalaya ang mga lubi tungod sa dakong init, apan natabangan sa ilang patron ang ilang mga pag-ampo nga mubundak ang ulan nga nagpabuhi sa mga pananom.

Sumala pa nga anaa gayud sa tema ang lubi tungod katunga nga panginabuhian sa mga residente anaa sa mga kalubihan.

Samtang sa maong aktibidad nahimong 2nd place ang Dadatan District, ug 3rd place ang Sta. Cruz District A, Consolation prize Linusutan District ug Cogon District.

Samtang ang nadawat nga premyo sa 1st place, 20 thousand pesos; 2nd prize, 16 thousand pesos; 3rd prize, 12 thousand pesos; samtang ang consolation prize, 5 thousand pesos.