25th Fiesta Celebration GKK NHA-Sta. Cruz-NHA Buhangin

Malampuson nga nasaulog ang ika 25 ka tuig nga Fiesta Mass sa GKK NHA Sta. Cruz niadtong Mayo 5, 2018 sa alas otso (8:00) sa buntag kauban ni Fr. James Philip R. Narisma CssR, parish priest sa Our Mother of Perpetual Help.

“Diha sa Krus gipadayag ang Gugma ug Kaluwasan” mao ang tema. Daghan ang nanambong sa maong santos nga Misa nga gisugdan ni Fr. James sa pagbunyag sa duha (2) ka mga bata tungod kay para niya ang pagbunyag lahi nga sakramento nga dapat dili isabay sa Santos nga Misa.

Malipayon ang mga nanambong tungod kay ang maong kalihukan makita man online tungod kay nagmalampuson man sila sa pagkuha sa serbisyo sa DXGN 89.9 Spirit FM Davao alang sa Facebook Live coverage ug delayed radio broadcast pagka alas dose (12:00 PM) sa udto. Malipayon tungod kay adunay konkreto nga handumanan sa maong higayon, ug mas daghan pa ang makakita niini, mga kaparyentihan ug kahigalaan nga naa na sa laing lugar.

Atol sa santos nga Misa (human sa mga pasalamat nga gihatag ni Fe Jayectin ang PSK) gipaila usab sa katawhan pinaagi ni Atty. Rose Brown, Chairman sa Awards Committee, ang mga opisyales o GKK Servant Leaders (GSL) gikan sa 1993 hangtud sa 2018. Ang Certificate of Appreciation gihayag panahon sa programa ngadto sa 43 ka mga GSL.

Nagsugod ang KSP Novena niadtong Abril 26, 2018 sa alas siete y medya (7:30) sa gabii. Kada gabii adunay mga input nga ginahatag sa parish formation team.

Ang prosisyon gihimo niadtong May 4 sa alas singko (5:00) sa hapon libot sa major road lang sa NHA. Testing kini nga oras para mahibaloan ug mas daghan ba ang manambong kay sa dati nga sa kaadlawon nga diin gamay lang ang partisipasyon. Mas daghan ang nanambong karong tuiga.

Pagka-gabii sa May 5 gihimo ang search for “Mutya ng NHA 2018 diin adunay unom (6) ka mga dalaga nga representative sa unom (6) ka sona. Midaog ang taga Zone 6 as Mutya 2018, 1st Runner-up zone 7 ug 2nd runner-up ang Zone 2.

Ang maong kalihukan sponsored sa NHA Mortuary Associations headed by Carmelito Padonia. Sa May 6, 2018 fiesta day nagconcentrate na ang mga GSL sa pag-atiman sa ilang mga bisita. Pagkagabii niana mao na ang “Dance Mania” nga headed by Danilo Dexter Guibone Jr. Daghan na ang wala nakatan-aw tungod sa sobrang kakusog sa ulan.

Bisan giulan ug perting kilat nianang May 4 sa gabii nga nakapasayo sa mga GSL sa pag-adto sa kapilya nianang May 5 aron manglimpyo ug balik na pud andam sa santos nga misa pagka alas otso (8:00) makaclaim pa gihapon kaming mga taga NHA nga palangga gihapon mi sa Ginoo tungod kay ang pinakasentro nga kalihukan ang “bunyag” ug “Santos nga Misa” nasaulog man nga malinawon. Salamat sa mensahe ni Fr. James nga “malipayong pagpasalamat sa tanang mga grasyang nadawat, mga pagsulay nga nalampasan. Ang pagpaningkamot nga ma-overcome ang mga weaknesses pinaagi sa paghimo ug mas daghan pa nga mga maayong buhat.” (Marieta Comighud | OMPH SocCom)