Pagsaulog, pasalamat sa proyekto sa parokya sa Lumondao

Kisameng nahuman. Kural nga gitukod. Social hall nga gipinturahan.

Mao kini ang pisikal nga hulagway nga among naabtan sa San Isidro Labrador Parish, Lumondao, Marilog District sa iyang ika-25 nga pista niadtong Mayo 15. Ang parokya nga nahimutang sa bungtod gidayo sa mga bisita ug parokyano isip pakighiusa sa kasaulogan.

Gipangulohan ni Bishop George B. Rimando, auxiliary bishop sa Dabaw, ang misa nga gitambungan sab sa kaparian sa bikaryato sa Sacred Heart.

Gawas sa pisikal nga kauswagan sulod sa unom ka tuig, gisaysay sad sa kura paroko nga si Fr. Edsel Paloma ang uban pa niyang proyekto sama sa “house to house living rosary diin kami nagatuyok sa mga balay balay sa bulan sa Nobyembre ug Disyembre.”

Pasalamat ang hatud ni Fr. Paloma sa tanang tabang nga iyang nakuha sa proyekto, hilabi na sa paghuman sa kisame nga karon 95% kumpleto na.