Bag-ong imahe sa nabanhaw’ng Hesus gipanalanginan

Gipangulohan ni Catholic Bishop’s Conference of the Philippines President ug Davao Archbishop Romulo G. Valles, D.D. ang pag unveil ug pag bendisyon sa imahe ni Jesus nga nabanhaw atol sa ika-17 nga kapistahan sa Ascension of the Lord Parish, Matina ning syudad sa Davao niadtong Mayo 13 sa alas sais y midya sa buntag.

Atol sa pakighinabi kang Fr. Bong Dublan ang kura paroko sa maong parokya, siya mibutyag nga ang maong imahe, gi-donate ni Mr. & Dra. Elizabeth Borja Villano family ug ang nagbuhat niini mao si Architect Brando Sedeño.

Butyag ni Fr. Bong nga tumong ug tuyo nga gibutang ang maong imahe isip kabahin sa architectural design sa maong simbahan, apan gipadayag niini ngadto sa katawhan nga ang maong lugar balaan, tungod bisan sa ground sa simbahan naka butang kini.

Butyag pa pagsulod pa lang sa simbahan masayod na ang mga magtotoo nga ang parokya mao ang Ascencion of the Lord.

Samtang siya midugang nga makatabang usab kini sa paglambo sa pagtoo sa publiko ngadtu kang Jesu Cristo.

Samtang sa pikas bahin, sa alas 9 sa buntag, gibendisyunan sab ni Archbishop Valles ang gym sa San Isidro Labrador Parish, Catalunan Grande, Davao City atol sa ika-19 nga kapistahan sa maong parokya.

Mensahe ni Abp. Valles sa mga parokyano nga himuong modelo si San Isidro Labrador sa iyang pagpanrabahong ‘makalangit’. Pagkamisyonero, matud pa ang himuon sama sa pag apil ug apostolado sa simbahan ang himuon aron makasulod sa langit, ang padulngan unta natong tanan.