25th fiesta sa San Isidro Lumondao gisaulog

Viva San Isidro Labrador!

Malipayon nga gisaulog ang ika-25 nga kapistahan ni San Isidro Labrador Lumondao.

Dakong kalipay gayud kay ang parokya miabot sa iyang silver anniversary diin matod pa natukod kini kaniadtong Setyember 29, 1993.

Ang kasadya sa maong pagsaulog gisugdan pinaagi sa Santos nga Misa nga gipanguluhan ni Bp. George Rimando inubanan sa mga kaparian sa bikaryato sa Sacred Heart.

Tapos sa Misa misunod dayon pagka ala una ang nagkalain laing programa nga giandam. Kabahin niini mao ang mga presentasyon sa matag zona, mga pasundayag kon intermission number sa mga batan-on ug uban pa. Misunod dayon ang Championship Game sa Basketball sa mga batan-on ug 40 upper division.

Sa pagkagabii, adunay gamay nga salo-salo ug kantahan o banda, inubanan sa mga manggihatagon ug kanunay nga nagasuportang parokyano, mga higala, KOA, Parish Choir, Parish staff.

Sumala ni Fr. Edsel Paloma, kura paroko, dakong pasalamat gayud niya nga namahimong malampusun ug nagmabungahon ang pagsaulog sa kapistahan sa patron ug kini dili mamahimong posible kon wala usab ang panabang sa mga parokyano sa San Isidro Lumondao. (Jamaicah Suam and Honey Kaye Etdang)