Summer Youth Camp sa Buhangin malampusong napahigayon

Malampuson nga napahigayon ang upat ka adlaw nga Summer Youth Camp 2018 (SYC18) sa Ministriya sa Batan-on (PSB) sa Parokya sa St. Mary of the Perpetual Rosary sa Buhangin, Davao City niadtong Mayo 9-12, 2018. Ang tema sa SYC18 gikutlo sa Ebanghelyo ni San Lucas 1:49: “Kay ang Makagagahum nagbuhat ug dagkung mga butang alang kanako ug Balaan ang Iyang Ngalan.”

Adunay 148 ka mga batan-on ang nitahan sa ilang kaugalingon nga gilangkuban sa Zona uno hangtud nueve nga madasigong nakigsadya, namalandong ug naminaw sa mga pulong sa Ginoo nga gipaambit sa nagkalain-laing mga imbitado nga mga mamumulong. Mao kini ang unang higayon nga nahimong fostering ang camp, diin ang mga batan-on gi-adopt sa mga nagkalain-laing mga pamilya nga aktibo usab sa pagpangalagad sa maong parokya.

Gisugdan ang unang adlaw sa SYC18 pinaagi sa pagsaulog sa Santos nga Misa nga gipangulohan sa Kura Paroko sa St. Mary of the Perpetual Rosary Parish nga si Rev. Fr. Jesus H. Samaniego. Inigkahuman sa Santos nga Misa gipahigayon ang Parade palibot sa Simbahan ug ang Praise and Worship sa St. Mary Parish Sports for Peace and Livelihood Training Center.

Sa ikaduhang adlaw, gipahigayon ang unang Plenary Session diin gisaysay ni Frederick Estoque, After Care Coordinator sa Sagop Kinabuhi Program (SKP) ang iyahang mga kasinatian, ug niining adlawa gisaulog ang Santos nga Misa nga gipangulohan ni Abp. Romulo G. Valles.

Gipadayon ang SYC18 sa ikatulo ka adlaw pinaagi sa duha ka Plenary Sessions nga gihatag nila Ryan Digan ug Armand Dura. Sa pagka gabii adunay Santos nga Misa nga gipangulohan ni Rev. Fr. Leomel Puerto, DAYCA Coordinator ug gisunod dayon ang Solidarity Night (Barrio Fiesta) diin nakig-uban ang mga foster parents sa mga batan-on.

Gihuman ang ikaupat ka adlaw nga SYC18 pinaagi sa Santos nga Misa diin si Rev. Fr. Matt Bernard Quiao ang nangulo niini.

Natagamtaman sa mga batan-on ang nagkadaiyang kasinatian diha sa ilang pagtambong sa SYC18 diin ang tanan nilang nakat-unan madala ug mapaambit nila didto sa ilang tagsa-tagsa ka mga katilingban. Sumala pa ni Jonalen Asares, Parish Youth Ministry (PYM) Coordinator sa St. Mary of the Perpetual Rosary Parish, dako kaayo ang iyahang pasalamat tungod kay nahimong malampuson ang SYC18 pinaagi sa paningkamot ug pagtinabangay sa pagpangandam sa parish youth core group ug volunteers ilabina sa suporta sa Kura Paroko, Rev. Fr. Jesus H. Samaniego. Nanghinaut ang PYM coordinator nga pinaagi niining SYC18 sa parokya mamahimo kining susi aron mas modaghan pa ang mga batan-on nga moaktibo sa kalihukan sa ministriya sa mga batan-on. (Sem. Saul Tony L. Medel)