Kura Paroko mapasalamaton sa tuig sa kaparian ug konsagradong kinabuhi

Mipadayag sa pagpasalamat ang Kura Paroko sa San Miguel Parish Panacan Dakbayan sa Davao tungod sa gipahigayong Medical Mission ug libreng tuli alang sa mga parokyano.

Ang maong aktibidad gipanguluhan sa mga kaparian ug relihiyoso nga sektor nga aktibong naglihok sa siyudad.

Butyag ni Fr. Gimeno nga dako na lamang ang iyang kalipay tungod nagkasinabot ang mga pari, madre ug nagkadaiyang kongregasyon sa relihiyosong pundok sa pagpili nga ipahigayun ang maong aktibidad sa maong parokya.

Sumala pa nga ang naka-benipisyo sa maong medical mission mao ang mga kabus, ilabi na nga kadaghanan kanila wala na nahimong prioridad ang pagpalit ug tambal alang sa mga balatian tungod ang nahimong prioridad ang pagpalit sa mga pagkaon.

“Daghan ang naka-benipisyo, ilabi na ang mga kabus, under my care. Kadaghan ani nila, mga trabaho mga naa sa construction ang bana. Naa poy pasyente naa sa dagat. Makita ninyo sila pobre gyud, mao na nalipay sila, kay sila ang gipili. Gipasabot nako sila nga sila ang napili. Ang uban ani nila bisan kalinturahon, agwantahon lang, kung naay kwarta padulong sa bugas, kung naay gibati ang uban imnan na lang tubig, maong lipay ko libre ang medisina,” sumala ni Fr. Jun.

Samtang usa sa nahimong benepisyaro sa maong medical mission mao ang trenta uno anyos nga si Rhea Quino, residente sa nahisgutang lugar. Sumala niya nga malipayun siya sa libreng check up ug sa libreng medisina nga iyang nadawat alang sa iyang ubo, sip-on ug pagsakit sa tutunlan.

Dugang pa niya nga mapasalamatun gayud siya tungod dako na kining tabang kaniya ilabi na nga aduna siyay tulo ka semana nga bag-ong himugso nga anak.

Samtang sumala sa pagpanubay gikan kang Fr. Bill Lourous, ang Vicars for Religious mikabat sa 300 ang naka benipisyo sa maong kalihukan alang sa nagkadaiyang balatian samtang 50 sab ka mga kabataan ang naka dawat sa libreng tuli. (Lourdelisa Perla | Father Urios University Intern)