“Isangyaw ang Maayong Balita, gamita ang pulong kung gikinahanglan.”

Solemnidad sa Pagsaka sa Langit sa Ginoo
Buhat 1:1-11; Sal. 47; Eph. 4:1-13; Mk. 16:15-20

Ngano kaha nga sa matag saulog nato sa Pagsaka sa Langit sa Ginoo, gisaulog usab nato ang Adlaw sa Kalibotanong Komunikasyon?

Tataw kaayo nga niining adlawa ang mga pagbasa naghisgot sa sugo ni Hesukristo ngadto sa iyang mga tinun-an sa pagpanglakaw sa tibuok kalibotan aron isangyaw ang Maayong Balita. Mao kini ang nadungog nato sa Ebanghelyo. Gitubag kini sa panahon na ni San Pablo diin nadunggan nato sa unang pagbasa ang iyang pagsangyaw sa tanang gitudlo ug gihimo ni Hesuskristo sa dinhi pa siya sa kalibotan. Samtang si Hesuskristo milingkod na karon sa tuo sa Amahan, ang hagit ania kanato sa pagpadayon sa pagsangyaw sa Maayong Balita.

Unsaon man nato sa paghimo niini sa kapanahonan karon diin dili lamang ang radio, mantalaan, telebisyon ug sine apan usab ang internet ug social media mao man ang dakung impluwensiya sa kinabuhi sa katawhan karon. Bisan gani ang ordinaryong drayber o tindera o mag-uuma, bata man o edaran, halos kada-adlaw man masayod na sa unsay uso o panghitabo tungod niining mga hitsas labina ang facebook. Maayo lamang unta kung kita nga mogamit niining mga hitsas igmat ug abtik nga mosala sa unsay maayo o dautan, sa unsay tinuod o bakak nga anaa diha niining maong mga pamaagi sa komunikasyon.

Ang ikaduhang pagbasa maoy nagtahi niining kalihukan nato karong adlawa. Ang tarung ug subay sa kabubot-on sa Dios nga komunikasyon anaa sa pagpaningkamut nga motunhay ang panaghiusa nga gihatag sa Espiritu Santo. Kini montunhay kung mapuy-an ang pagpailob, pagmaaghop ug pagtinabangay. Inay bakak ug pandaot ang atong ipakaylap diha sa social media, sa mga salida, sa telebisyon, mantalaan o radio, dili ba diay mahimo ang Maayong Balita?

Matud pa ni Santo Papa Francisco, “Ang pinakamaayong sumpa sa bakak dili mga estratehiya kondili ang mga tawo: mga tawo nga dili hakog kondili andam mamati, mga tawo nga maningkamot sa sinsiro nga pakig-diyalogo aron ang kamatuoran mopatigbabaw; mga tawo nga nadani sa kaayo ug nibarug sa responsibilidad sa ilang pag-gamit sa linggwahe.”

Ang tinuod ug gikinahanglan nga linggwahe nga atong gamiton anaa sa atong mga taras ug kinaiya nga maayo aron makabig ang atong isigkatawo. Dili ang pulong kondili ang buhat maoy unang epektibo nga pagsangyaw. Matud pa ni San Francisco, “Isangyaw ang Maayong Balita, gamita ang pulong kung gikinahanglan.”