Medical mission gipahigayon sa Tuig sa mga kaparian ug konsagradong kinabuhi

Gipahigayon ang usa ka medical mission sa San Franciso de Asis Parish – Tagakpan niadtong mi-aging Domingo, Abril 23. Ang maong medical mission gipahigayon subay sa pagsaulog sa Tuig sa mga Kaparian ug Konsagradong Kinabuhi. Gisugdan ang medical mission sa alas-9 ang takna sa buntag ug nahuman kinahaponan.

Gisugdan ang medical mission pinaagi sa pagsaulog sa Santos nga Misa nga gipangulohan ni Most Reverend Abel C. Apigo, D.D., Bishop of Mati, ug ang nag konselebrar mao si Rev. Fr. Brian Ranses, M.I.

Sa homiliya, gihatagan ug duot ni Bishop Apigo ang pag-ampo alang sa mga clerigo, hilabina kadtong naay tawag sa pag-alagad sa Ginoo isip pari o relihiyoso. Gibutyag usab ni Bishop Apigo ang pagkamaayo nga magbalantay sa atong Ginoo; gihalad gayud ni Jesus ang iyang kinabuhi para sa iyang sa mga karnero.

Mipartisipar sa medical mission ang mga kaparian ug mga relihiyoso gikan sa nagkalain-lain nga mga kongregasyon, sama na lamang sa Presentation of Mary Sisters, Benedictine Nuns, Missionaries of Charity, SVD Brothers, Alexian Brothers ug uban pa.

Miduyog usab ang medical team sa Southern Philippines Medical Center (SPMC) ug Alexian Outreach Clinic sa pagserbisyo sa medical nga panginahanglan sa mga parokyano sa Tagakpan. Mapasalamaton ang mga parokyano sa serbisyong medical sama na lamang sa dental services, check-up sa mata, operation tuli, ug general check-up.

Matud pa ni Father Peter Fancubila, OSJ, ang Kura Paroko sa San Francisco de Asis Parish, mapasalamaton gayud siya sa mga tawo likod sa medical mission tungod sa ilang pagkamanggihatagon:

“We are blessed and overwhelmed by the generosity and goodness of the medical team, religious men and women and lay volunteers to freely provide us medical services.”

Gidungag pud ni Fr. Peter nga dako kaayo ang tabang niini sa mga nanginahanglan nga parokyano. Mapasalamaton kaayo siya sa grasya sa Ginoo kay ang maong aktibidades giabrihan pinaagi sa Santos nga Misa nga gipangulohan sa bag-ong Obispo sa Mati, Most Rev. Abel C. Apigo, D.D.

Dako usab pagpasalamat sa mga nakadawat ug serbisyong medical. Sumala pa ni Oning Catcha, kinsang anak nakabenepisyo sa libreng tuli, mapasalamaton kaayo siya sa oportunidad nga gihatag sa Ginoo sa pagpahigayon sa maong outreach program.

Sa pag-ampo alang sa tuig sa mga kaparian, nahisaysay didto ang mga pulong: “Nangamuyo kami nga ang Ebanghelyo magdani kanamo sa pagbuhat, sa pagpangita sa mga nanginahanglan, ug masinabtanon nga moatiman.” Busa, ang pagpahigayon sa medical mission usa lamang sa mga manipestasyon sa gugma sa Ginoo alang kanato.

Ang pag-gahin ug panahon alang sa mga igsoon nato nga nanginahanglan ug tabang usa na ka dakong oportunidad aron atong mapabati kanila nga sila gihigugma, ug sa kanunay adunay maayong kamot nga andam mutabang sa panahon sa kalisdanan. (SFDA Tagakpan SoCCom Team)