Pabilin Kanako

Ika-limang Domingo sa Pagkabanhaw
Buhat 9:26-31 / 1 Juan 3:18-24 / Juan 15:1-8

Namatikdan seguro nato nga ka-pito balik-balika ni Jesus ang mga pulong “magpabilin kamo kanako” ning atong ebanghelyo nga gibasa karong adlawa. Matud pa sa mga skolars, aduna kini’y halawom nga kahulugan. Niining tungora, pamalandongan nato ang unang pagtulun-an nga atong makutlo: Dili gayud mahibulag sa kinabuhi sa mga tumutuo, kining duha ka bahin sa atong pagtuo, nga mao ang Krus ug Pagkabanhaw sa atong Ginoo diin gilarawan niining nga pagpol-ong o pagputol sa mga sanga – ug pagpamunga, kon magpabilin kita sa punoan sa paras.

Ang pagpabilin diha kang Cristo nagpasabot nga sundon nato ang samang kinabuhi nga gikinabuhi ni Cristo sa dinhi pa siya sa kalibutan-sama sa: mahagoong pagsangyaw sa maayong balita, ang wala pagsabot sa mga naminaw kaniya, ang pagpasangil kaniya nga siya si Satanas, ang pagbiay-biay sa iyang mga gibuhat nga pag-alim, nga siya bakakon, ang pagsakit kaniya sa mga latus, paglansang kaniya sa krus, pagpatay, apan luyo ning tanan, siya nabanhaw, nagmadaugon batok sa kamatayon ug sala, nabuhi pag-usab.

Usa ka hularan, nga mahimong sumadahon sa mga pulong “siya nagmasinugtanon sa kabubut-on sa Dios.” Kon magmasinugtanon kita sa Kabubut-on sa Dios, kita usab moagi sa pagpol-ong ug pagputol nga nagpasabot sa kasakit nga gikinabuhi ni Cristo, apan mamunga usab diha sa bunga sa kabanhawan, uban ni Cristo. Ang pagbalik-balik sa imbitasyon nga “pagpabilin kanako” (7X nagpasabut nga ‘hingpit’) naghisgot ug hingpit nga pagtubag nato sa imbitasyon sa pagpakighiusa sa matuod nga Paras kinsa miagi ning tanan nga pag-antus ug kasakit tungod ug alang sa pagsunod sa kabubut-on sa Dios. Kon dili kita magpabilin diha kaniya, sama kita sa patay nga mga sanga ug dili na gayud mamunga, kay naputol na man sa punoan sa Paras.

Ang imbitasyon ni Jesus kanato usa ka gasa nga mahitabo matag gutlo ug kinahanglan nga dawaton nato sa kinasingkasing gayud. Ang Dios dili gayud mamugos kanato tungod kay nagtahud siya sa atong kagawasan. Usa ka imbitasyon nga kon dawaton inubanan sa gugma, magdala kanato sa kalipay nga mohangtud. Gamiton unta nato karong adlawa, ang pag-ampo nga nag-ingon: “Magpabilin ako kanimo Ginoo, hangtud sa kahangturan. Amen.” (Sr. Rica Dalaguit, FSP)