Sunda ang Iyang Tingog

Ika-Upat nga Domingo sa Pagkabanhaw
Buhat 4:8-12 / Sal. 118:1,8-9,21-23,26,28-29 / 1 Jn. 3:1-2 / Jn. 10:11-18

Ang Ebanghelyo nagapahinumdom kanatong tanan nga si Hesus mao ang maayo nga magbalantay. Nindot kaayo kung ato kining sabton, kay daw, lisod masabtan ang maong imahe labi na sa atong lugar ug panahon karon.

Ang pagbantay ug karnero mao ang usa sa mga trabaho nga komon sa kapanahonan ni Hesus. Ang pagbantay sa karnero dili gayud sayon, kay adunay mga kawatan, saag nga mga iro, ug uban pang makadaot o makapatibulaag sa mga karnero. Usa sa mga pamaagi sa pagbantay sa karnero mao ang pag-paila sa mga karnero sa tingug sa ilang magbalantay. Adunay tingog nga gina paambit sa magbalantay aron sundun siya sa iyang mga karnero. Maskin adunay pay laing mga tingog nga nag agni sa mga karnero o sundugon man kini sa uban ang maong tingug, didto gihapon kini siya sa iyang magbalantay.

Sa unsang paagiha makapalalum ug makapalig-on sa atong relasyon sa Ginoo?

Ang kasiguraduhan nga gihatag ni Hesus alang kanato, mao nga siya ang atong maayong magbalantay, maghatag kanato ug dakong paglaum maskin adunay mga kalisdanan ug mga pagsulay. Una niya kining gipasabot pinaagi sa pagkumpara sa maayong magbalanatay ug sa usa ka magbalantay nga sinohulan lang. Ang paghatag sa iyang kinabuhi alang sa iyang karnero mao ang kalahi-an sa maayong magbalantay ug sa sinohulan nga magbalantay. Ug mao kini ang gibuhat ni Hesus alang kanatong tanan. Tinuod nga gihatag ni Hesus ang iyang kinabuhi alang kanato diha sa pagkamatay niya sa krus ug sa iyang pagkabanhaw. Nagpasabot kini nga dili kita biyaan ni Hesus sa atong kalisdanan, sa mga kahadlok, ug mga pagsulay. Busa kita gi-awhag sa pagsalig kay Hesus.

Ang ikaduhang pagpasabot ni Hesus, nga siya ang maayong magbalatay mao ang pag-ila sa iyang tingog. Nindot kini pamalandongan sa atong tagsa-tagsa nga kinabuhi. Kay kinsang tingug man akong ginasunod? ginadala ba ko ani paduol sa Ginoo? O dili kaya, ginasundog ba nako ang tingog ni Hesus aron makadani ug uban palayo sa Ginoo? Nagpasabot kini nga kita ginapahinomduman sa pagpaminaw sa tingog ni Hesus. Busa kita gipahimangnuan sa pagbantay sa atong mga ginabuhat. Kinahanglan nagapaduol kini kanato sa Ginoo.

Sa pagkabanhaw ni Hesus, hinaut kini maghatag kanato ug dakong paglaum nga si Hesus kanunay naa sa atong tupad — ang maayong magbalanatay. (Bro. Ramon Jamora)