Kapistahan ni San Vicente Ferrer

(Photo by Charlou Daguplo)

Gisaulog sa Gagmay’ng Kristohanong Katiliban ang ilahang ika 55 ka tuig na selebrasyon sa ilang Patron nga mao si San Vecente Ferrer niadtong Abril 6. Ang maong GKK nahisakop sa Parokya sa San Fransisco De Assisi Tagakpan ug nahitungod kini sa Brgy. Manambulan, Tugbok, Davao City.

Ang maong selebrasyon gipangunahan sa ilahang Kura Paroko Rev. Fr. Peter Fancubila OSJ sa usa ka misa, ug gisundan kini sa pagbunyag sa unom (6) ka mga bag-ong myembro sa simbahang Katoliko.

Sulod sa maong misa gibatbat ni Rev. Fr. Peter Fancubila ang ka-importante sa mga tudlo ni San Vicente Ferrer nga halangdon mahimong giya sa pang adlaw-adlaw na panginabuhi. Sama na lamang ang pagkahihusama niini sa usa ka Anghel sa matag higayon nga kini nagapakaylap sa maayong balita sa Ginoo.

Si Marilyn Depariene nga kanhing Secretary sa maong GKK ug karon maoy aktibong tresurera nagapasalamat ug dako nga siya nahimong myembro sa maong katiliban. Matud pa niya, “nagapasalamat ko nga naka-alagad ko ug ing-ani ka dugayon.” Si Marlyn naga alagad na sulod sa 17 ka tuig sa maong GKK.

Ug nagpadayon ang selebrasyon sa mga myembro sa maong fiesta pinaagi sa pagpatigayon sa ilahang Liga sa Basketball nga gipanguluhan sa ilang mga kabatan-onan asa diin malampusong natapos sa hapon nianang adlawa. (Charlou Daguplo)