Mga Ursuline Sisters nagpromotar sa Vocation Awareness

MATI CITY – Ika-upat ka bulan na karon nga ang mga Ursuline Sisters of the Canadian Union kon Order of St. Ursula (OSU) ang nagtangyag sa pagtabang alang sa pag-promote sa vocation awareness in general sa mga parokya sa diyosesis sa Mati, Davao Oriental, sugod niadtong Mayo 2013 hangtud Mayo 2014.
Sumala ni Sr. Lilia G. Castel, OSU, Vocation Directress, kini ang ilahang nakauyunan agig pagpasalamat sa Diyos atol sa ilahang umaabot nga kasaulogan sa ika-25 nga pundasyon sa OSU sa Mati, partikular sa ispirituhanong pag-umol sa sentido sa bokasyon sa mga kabatan-onan, “that this program be an occasion for all the youth to become more aware of the importance to discern and answer the call of God in their lives as fellow workers in the Lord’s vineyard.”
Human makuha usab sa OSU congregation ang approval ni Obispo Patricio H. Alo alang sa maong kalihokan sa diyosesis gisugdan sa mga madre ang pagkontac sa mga kura paroko ug pagbisita sa lainlaing mga parokya aron ikapasabot pa gayud ang mahitungod sa ilahang information campaign for vocation awareness.
Ang parokya o institusyon ang pagahatagag tunga lang nga adlaw sa paghisgot, pagpaambit ug pag-ampo alang sa bokasyon. Kini himoon sa adlaw nga domingo lamang, gikan alas ocho sa buntag (8:00AM) hangtud alas dose sa udto (12:00 NN); ug adunay libreng merienda para sa tanang manambong.
Ang nahisgutang buhat sa Vocation Awareness maoy usa sa uban pang mga proyekto sa mga Madreng Ursuline aron ilahang mapadayag ang ilang kalipay ug pagpasalamat sa Diyos sa 25 ka tuig sa ilahang pag-alagad sa diyosesis sa Mati pinaagi sa pagfacilitate og mga Retreat ug Recollection sa ilang gambalay, ang Marie de l’Incarnacion Retreat Center sa Capitol Hills, Mati City; pagtudlo og katekesis sa mga bata ug ilahang mga inahan; ug pagtabang sa ilahang pag-angkon og pormal nga edukasyon.
Para sa dugang kasayuran, mahimong i-contact si Sr. Lilia niining mga numero sa mobile phones: 09292107427 (smart) o 09278585158 (globe). Ang Ursuline community nanghinaut usab nga ang Diyos manalangin sa tanan ug ingon man sa ilahang mga paningkamot alang sa usa ka makahuluganon nga kasaulogan sa pinilakang jubileyo sa ilang pundasyon. (by Sr. Marietta H. Alo, OND)