Livelihood Program sa San Francisco Parish, Maa – Gilunsad na!

Niadtong Agosto 25, 2013 gilunsad ang Programa sa parokya ni San Francisco sa Assisi dinhi sa Maa nga mao ang Livelihood Program inubanan sa mga katambayayong diha sa TESDA XI (Technical Education and Skills Development Authority XI).
Ang maong pag-lunsad gisugdan pinaagi sa pagsaulog sa Santos nga Yukaristiya uban sa Arsobispo sa Dabaw, Most. Rev. Romulo G. Valles, D.D, ang Kura Paroko Rev. Fr. Emmanuel “Bong” Gonzaga, DCD ug ang mga partisipante o mga trainees nga mikabat sa 636 nga nahisakop sa Parokya sa Maa. Pagkahuman sa Misa, gisundan dayon kini og orientasyon ug pag-ila-ila sa mga tao nga gikan sa TESDA. Gitambongan kini sa TESDA Regional Director, Engr. Gaspar Gayuna, Mr. Bayani Godofredo ang Center Administrator Provincial Training Center sa Davao ug ang mga kaabag diha pagtuman og magtutudlo sa mga kurso nga nakalatid sa Livelihood Program.
Mao kini ang mga nalatid nga mga kurso alang sa maong Livelihood Program: Baking and Pastries, Carpentry, Cooking, Electronics, Food Processing, Hair Cosmetology, Organic Farming, Vermicomposting, Painting, Plumbing, Poultry/Hog Raising, Welding, Dress making ug ang Welding nga magsugod na sa bulang Setyembre ning tuiga 2013.
Libre kini nga gipaambit sa Parokya alang sa mga trainees nga sakop sa Parokya sa Maa ug tumong niini nga mahatagan og kalamboan ang kaalam alang sa ilang panginabuhian, nga dako kaayong tabang usab sa katawhan sama sa kinaiyahan ni San Francisco sa Assisi ang pagtabang sa mga nanginahanglan.