Parish General Assembly, gipatigayon

500 plus ka mga Servant leaders sa nagkalin-laing Gaymay’ng Kristohanong Katilingban (GKK) ang nitambong sa Parish General Assembly nga gipatigayon sa Parish Pastoral Center sa Sto. Rosario Parish of Toril, Marso 4, 2018.

Ang maong General Assembly gibahin sa duha ka hugna: ang service committee nga gilangkuban sa PSK, PSA, PSB, PSKB, Secretary ug Treasurer. Ang worship committee nga gilabgkuban sa PSL ug PSP nga ipatigayon karong Marso 11, 2018.

Gipadayag sa kura paroko Rev. Fr. Roy Mejias ang tulo ka punto sa gipatigayon nga General Assembly: una aron sa pagpangandam sa mga GSL sa pagahimoon nga sending forth, ikaduha, ang pagpasalamat ni Fr. Roy sa suporta nga gihatag kaniya ug ikatulo ang nakasagaran na nga gimbuhaton.

Gisugdan kini pinaagi sa pag-ampo nga gipangulohan ni Bro. Doming Aguhob. Gihatag usab ni Sis. Felomina Fernandez ang oryentasyon sa maong programa, aron adunay common direction ang matag usa. Naghatag usab ug tulo ka pangutana si Sister Mildred Sasam sa groupings nga gihimo aron sa pagpamalandong sa matag GSL.

Naghatag ug input ang Social Action Director Rev. Fr. Leonardo A. Dublan Jr. mahitungod sa ispiritualidad sa pagkausab sa kinabuhi. Kini ang transpormasyon sa katilingban nga ang matag usa nalambigit niini. Hagit ni Fr. Dublan ang pagbag-o sa hunahuna, pagbag-o sa kaugalingon aron sa pagtubag sa transformation.

Pagkahuman sa input ni Fr. Dublan gipadayag sa matag ministriya ang ilang kasinatian ug gibati diha sa pagpangalagad. Naghatag usab sila ug sugyot alang sa dugang pagpalambo sa pag-alagad.

Mapasalamaton si Fr. Mejias sa gihimong Parish General Assembly. (Joy Ardepolla | SRP SoCCom)