Fr. Chito Suganob misaysay sa iyang kaagi sa Marawi siege

Fr. Chito Suganob

Mitambong sa gipahigayong Diocesan Clergy of Mindanao Convention si Fr. Chito Suganob sa Butuan City, diin masadyaong mi-himamat ang maong pari sa susama niyang mga pari nga naggikan sa nagkadaiyang parte sa Mindanao.

Sumala ni Fr. Suganob, iyang gi-angkon nga padayon pa siyang nagpaalim sa iyang nahiagumang trauma ug stress sa nahitabong gyera sa Marawi City, human siya gi-hostage sa mga Maute Isis sulod sa 116 diyas. Kuyog niya ang laing mga hostage nga mga layko nga mokabat sa kapin kon kulang 120 ka indibidwal, lakip na ang mga babae ug mga bata.

Dugang ni Fr. Suganob nga wala siya magtoo nga maka-lingkawas pa siya sa maong gyera tungod sa matag adlaw sa gyera, pirmi niyang gina-atubang ang kamatayon.

Tungod kadaghan sa kanyon ug bomba nga gihagbong sa eroplano, aminado si Fr. Chito nga sa maong higayon, nakapangayo siya ug pasaylo sa labaw’ng makagagahum sa iyang mga nahimong kasaypanan.

Sumala sa maong pari nga sa dihang anaa siya sa kamot sa mga Maute, wala siya gidagmalan, ingon man anaa sab ang saktong pagkaon kanila, tungod ang tibook Marawi maoy gi-ukupa sa mga terorista.

Samtang mapasalamaton si Fr. Chito sa katawhan, ilabi na sa mga naglihok sa simbahan, tungod sa walay puas nga pag suporta ingon man pag-ampo aron buhi siya nga makaigwas sa maong gyera. Apan mihangyo siya sa tanan nga ipadayon ang pag-ampo kaniya, arun mawala na ang trauma nga padayon niyang nasinati.

“Pinaagi sa pagtoo sa Ginoo, nakakuha ko ug kusog, ingon man kaya nako nga mo-smile, unta padayon ko ninyong iampo arun maulian na ko, maulian na ang trauma ug stress, kung dili man maulian, at least man lang, kaya nako macontrol ang akong kaugalingon, kung akong mahinumduman ang akong kaagi sa gyera,” butyag ni Fr. Suganob.

Midugang siya nga bisan sa iyang nahiaguman nga kapait sa gyera, buot niyang magpadayon ang Interreligious Dialogue, tungod sumala pa, nga ang buot sa Simbahan ug sa Ebangehelyo, magkahiusa ang katawhan.