Bag-ong Obispo sa Tandag mipaambit sa iyang kasinatian

“Gibati nga dili masabtan, nangurog, tungod grabe ang tawag sa labaw’ng makagagahom, naa gayuy misteryo, ingun man adunay pagbati nga dili angayan, ug kalipay nga nakita sa Ginoo nga iya kong gisaligan.”

Mao kana ang gikabutyag ni Fr. Raul Dael, kinsa mao ang Bishop-elect sa Diocese sa Tandag sa dihang gipahibalo siya sa Papal Nuncio nga siya ang gipili sa Santo Papa nga maoy mamahimong Obispo sa Diocese sa Tandag.

Gikabutyag ni Bishop-elect Dael nga iyang paningkamutan nga alagaran ang mga Tandaganon, tungod mao kini ang gisangon kaniya sumala pa nga ang iyang pinaka-unang buhaton sa pagdumala niya, sa maong dapit, iya unang paminawon ang katawhan sa lugar, mag-obserbar sa katawhan, ingon man makighigala kanila, tungud nagtoo siya nga ang pagka-Obispo dili magtrabaho nga mag-inusara, tungod anaa gayod ang pagtambayayong sa Obispo ngadto sa kaparian ingon man sa katawhan.

Mibutyag ang bishop-elect sa Tandag nga sa iyang 25 ka tuig sa ministriya sa pagkapari aduna gayud siyay nasagubang nga mga kalisud, sumala pa nga ilabi na gayud ug kung ang pagserbisyo tinud-anay, tungod adunay mga tao nga masuko sa pagsangyaw sa kamatuoran.

Siya midugang nga iya gayong suportahan ang Oplan Tokhang sa Administrasyong Duterte pinaagi sa pagtabang sa mga drug surrenderees, sumala pa ni Bishop Elect Dael nga sa iyang kasinatian sa Cagayan De Oro sa mga surrenderees, maayo ang nahimong resulta, tungod mihatag siya ug mga talks, lecture ingon man ang pagpakumpisal kanila, butang nga ang mga surrenderees sa iligal nga droga, nakasinati ug kabag-ohan, lakip na ang ilang pamilya.

Si Fr. Dael nagbutyag nga kausa ka beses lamang siya nga naka-adto sa Diocese sa Tandag apan dali ra sab kaayo nga panahon, butang nga hinay-hinay na siya nga mibasa, namalandong, nangutana, aron mahibaloan niya kung unsa ang mga Tandaganon ug unsa usab ang Tandag City.

Nasayran nga niadtong miaging Buwan sa Pebrero, si Fr. Dael mao ang Vicar for the Clergy sa Cagayan De Oro, gi-appoint ni Pope Francis nga mamahimong Obispo sa Tandag. Ipahigayun ang iyang ordinasyon sa pagka Obispo karong umaabot nga Hunyo 7 sa Cagayan De Oro ug sa umaabot nga Hunyo 14 mao ang iyang installation sa Diocese sa Tandag.