Pagkabanhaw sa Ginoo atong puy-an ug isangyaw

Domingo sa Pasko sa Pagkabanhaw sa atong Ginoo
Acts 10:34,37-43 / 1 Cor 5:6-8 / John 20:1-9

Unsa kaha kon wala nabanhaw si Hesus? Usa siguro ka dakong skandalo ilabi na sa iyang mga tinun-an kon wala siya nabanhaw. Kon wala pa siya nabanhaw, ang iyang mga pulong og mga buhat walay bili og kapuslanan kay kini gimugna lamang usa ka dakong bakak. Nan, makaingon kita na si Hesus bakakon og ang iyang bakak nagaluntad sa kapanahonan. Tungod niini, makaiingon usab kita nga ang atong relihiyon walay bili og kapuslanan kay bakak man ang nahimong pondasyon niini. Sa laing bahin, kon wala pa nabanhaw si Hesus, sigurado nga anaa pa kita sa kangitngit gumikan sa atong mga sala. Nagpabilin kitang ulipon sa atong sala. Wala kitay paglaum sa atong kinabuhi ilabina sa paglaum sa pagbaton sa kinabuhing dayon. Kung aduna man kitay pagtuo niya, kini kawang lamang. Kini gipahimatud-an ni San Pablo ngadto sa mga Corinto “Kung si Kristo wala mabanhaw, nan ang atong pagsangyaw kawang ug ang inyong pagtoo wala’y kapuslanan.” Cor. 15:14.

Mga igsuon, ang atong ebanghelyo karon nagsaysay mahitungod sa haw-ang nga lubnganan ni Hesus (empty tomb of Christ). Kining panghitabua usa ka konkreto nga timailhan na gibatog ni Hesus ang kamatayon og siya mahimayaong nabanhaw. Ang pagkabanhaw ni Hesus nagpamatuod nga siya Anak sa Dios, og siya Dios mismo. Ang misteryo sa pagkamatay og pagkabanhaw ni Hesus nagtanyag kanato og duha ka bahin: Una, pinaagi sa iyang kamatayon, aduna kitay kagawasan sa atong mga sala, og ang ikaduha, pinaagi sa iyang pagkabanhaw, giabrehan niya alang kanato ngadto sa bag-ong kinabuhi. Nan, ang pagkabanhaw ni Hesus og nabanhaw nga Hesus mao ang prinsipyo og tinubdan sa atong umaabot nga pagkabanhaw.

Unsa man ang hagit kanato karon? Ang atong unang pagbasa nag-awhag kanato nga mahimong buhing saksi sa pagkabanhaw ni Hesus. Kini nagpasabot na aduna kitay kaakuhan sa pagsangyaw sa buhing Hesus sa katawhan. Ang pagsangyaw dili lamang limitado sa mga pulong nga atong gipangbungat sa uban, apan apil usab ang atong personal na relasyon sa nabanhaw na si Hesus. Apan ang pangutana, kumusta man ang atong personal na relasyon kaniya? Buhi pa ba o himatlayon na? Ang atong ikaduhang pagbasa magpahinumdom unta kanato sa pagbag-o sa atong kaugalingon gikan sa daan mga buhat nga makapahilayo kanato sa Ginoo. Hinaot nga ang nabanhaw na si Hesus, maghatag kanatog kadasig sa pagbag-o sa atong kaugalingon aron mamahimong iyang buhing saksi, og maghatag kanatog buhing paglaom sa atong umaabot nga pagkabanhaw. Malipayong Pasko sa Pagkabanhaw! (Louis Jasper V. Alfeche)