Ang napulo’g duha ka Artikulo sa Pagtuo

Nagatoo ako sa Dios, ang Amahan, ang makaggahum sa tanan, magbubuhat sa langit og sa yuta, ug sa tanang mga makita ug di makita.

Hamubo nga
Pagpasabut

Ang Dios isip Amahan, giila sa mga Israelita ug sa mga Kristiyanos. Alang sa mga Israelita sa Karaang Tugon ang hulagway sa Dios isip usa ka Amahan wala mahatagi ug lawom nga pag-ila. Apan wala usab magpasabot nga kini walay bili alang kanila. Ang Dios isip ilang Amahan nagsukad sa ilang kasinatian nga ang Dios manluluwas. Gani mas nasinati ug gituohan nila pag-una nga ang Dios manluluwas, misunod na lamang ang ilang pagpamalandong nga ang Dios nga maoy nagluwas kanila mao usab diay ang Dios nga nagbuhat kanila ug sa tanang kabuhatan. Diha sa Exodo nasulat: “Mao kini ang giingon sa Ginoo, Si Israel mao ang kamagulangang anak nga lalaki” (Ex 4:22-23). Usab sa basahon ni Propeta Isaias ang mga Israelita miangkon sa pag-ingon: “Apan ikaw, O Ginoo
maoy among Amahan, Ikaw kanunay maoy nagluwas kanamo” (Is 63: 1 5-1 6). Nagpasabut kini
nga ang mga Israelita nag-ila sa Dios nga ilang Amahan tungod sa kasinatian nila sa kaluwasan pinaagi sa panabang sa Dios. Nakapamalandong usab sila nga ang Amahan mao ang nagmugna sa tanan kabuhatan.
Sa laing bahin, alang sa mga Kristiyanos, ang pag-ila nila sa Dios isip Amahan gihulagway sa kasulatan pinaagi sa talagsaong relasyon ni Hesus ngadto sa Amahan. Sa makadaghang higayon si Jesus naghisgut sa Dios nga Iyang Amahan (labaw sa 70 ka higayon diha sa Bag-ong Tugon). “Walay nasayod sa Amahan gawas sa Anak, ug kadtong buot sa Anak nga ipaila Siya” (Mt.1 1 :27). Sa dihang nangutana sa Felipe kang Hesus: “Ipakita kanamo ang Amahan ug igo na kana kanamo”. Si Jesus mitubag: “Kinsa ang nakakita kanako nakakita sa Amahan. Wala ba kamo motuo nga ako anaa sa Amahan ug ang Amahan ania Kanako?” (Jn 1 4:9-1 0).
Ang Dios Amahan gitawag nga Makagagahum sa tanan. Kini ang usa hiyas sa Amahan nga gihisgutan sa Credo. Ang gahum sa Dios may tulo ka kinaiya: 1 ) Malukopon – tungod kay Siya magbubuhat og nagmando sa tanang butang, way sukod ang pagkalabaw sa bisan unsa ug bisan kinsang amahan nga atong nasinati dinhi sa yuta; 2) Mahigugmaon – naglantaw sa kaayohan sa Iyang katawhan; 3) Usa ka misteryo – tungod kay ang sala ug mga kasakit sa daghang mga tawo sa kalibutan dili malilong ug dili sayon sulbaron. Ang Dios nga gamhanan ug magbubuhat sa tanan, dili ba makasulbad niining mga suliran? Ang Cristohanong pagtoo wala mohatag ug sayon nga tubag niini. Nagtanyag hinoon kini ug hagit sa pagpalig-on batok sa mga walay hinungdan ug hawa nga paglaum diha sa mga kasakit (CCC 309).

Hagit

Sa pagpadayag nato diha sa Credo nga ang Dios Amahan ug labing Makakagahum sa tanan, atong gibutang ang atong kaugalingon sa usa ka panglantaw ug gabayan sa kinabuhi. Ang pagila sa Dios nga atong Amahan nga labing gamhanan naghatag ug sukaranan dili lamang sa kahulogan sa kinabuhi, kon dili usab sa atong panglihok ug pamatasan, ug sa tibook kinabuhi sa pag-ampo. Gipadayag ta ang Dios nga maoy sukaranan nga labing bililhon sa atong kinabuhi: ang atong panhunahuna, panglihok, pagka-kita ug sa atong pag-ampo. Isip mga anak sa Dios sa unsang paagi ug mga kahigayonan diin kita mituman sa Iyang mga kasugoan? Isip mga piniyalan giunsa nato pag-atiman ang Iyang kabuhatan?