Pulong sa Kinabuhi

“Tudloi ako, Ginoo, sa mga dalan mo ug ipaila kini kanako” (Sal 25, 4).

Ang hari ug propeta nga si David, ang tigsulat niining Salmo, mikurog ug nangaghoy sa tumang kaguol ug kalisod kay gilibotan na siya ug nameligro atubangan sa iyang mga kaaway. Buot unta siyang makalingkawas sa laing dalan aron mahilayô sa kapildihan, apan naugtas na siya ug nawad-an nag umoy ang iyang kabukogan. Busa giyahat niya ang iyang mga mata ug misangpit ngadto sa Dios sa Israel, nga sa dugay nang panahon mao ang tigpanalipod sa iyang katawhan ug puno sa paglaum nag-ampo sa pagpakitabang.

Ang Pulong sa Kinabuhi ning bulana naghatag gimbug-aton, sa iyang gihangyo nga ilhon nato ang mga dalan ug agianan sa atong Ginoo, isip kahayag sa atong mga kaugalingong panghukom kon unsay angay buhaton, ilabina sa mga higayon sa dagkong mga pagsulay.

“Tudloi ako, Ginoo sa mga dalan mo ug ipaila kini kanako”

May mga higayon nga kita usab mapugos sa pagpili kon unsay angay pagabuhaton alang sa atong kinabuhi, ug sukitsukiton ta niini sa kaugalingon natong tanlag; usahay daghang mga posibilidad ug pamaagi nga mapilian nato atubangan sa mga problema apan magpanagana ta sa paghukom kon unsay hustong buhaton. Sa ubang higayon, morag wala tay mahimo … Tawhanon ra ang pagpangitag mga pamaagi aron makapadayon ta sa atong panaw sa kinabuhi. Usahay nanginahanglan tag tabang gikan sa mga tawong suod kanato sama sa usa ka amigo o amiga. Ang tinuohang Kristohanon makapasulod nato sa pakig-amigo sa Dios: Siya ang Amahan nga suod kaayo nato ug nakaila kanato sa tibuok natong pagkatawo ug buot siyang mouban kanato sa dalan nga atong gilaktan.Kada adlaw gidapit ta niya, ug sa walay pagpamugos, nga ang tagsatagsa kanato mokuyog sa usa ka kolbahinam nga panaw, diin ang gihuptan sa atong mga kamot mao ang kompas sa gugma nga walay kondisyon, ngadto Kaniya ug ngadto sa tanang mga anak sa Dios. Ang mga dalan ug mga agianan mao ang mga kahigayonan sa pakig-hugoyhugoy sa mga tawong miapil sa maong panaw,sa pagdeskobre sa mga bag-ong mga tinguha ug sa pagpakig-ambit sa uban bahin niini. Ang usa ka Kristyano dili tawo nga nag-inusara lamang. Kabahin siya sa usa ka katawhan nga nagpanaw padulong sa proyekto sa Dios-Amahan alang sa tibuok kalibotan. Gipadayag kini ni Jesus dinhi sa yuta, pinaagi sa iyang mga Pulong ug pinaagi sa tibuok Niyang kinabuhi: kini mao ang malukpanong panag-inigsoonay, kini mao ang mga katilingban diin ang gugma maoy naghari sa tanang katawhan.

“Tudloi ako, Ginoo sa mga dalan mo ug ipaila kini kanako”

Ang mga agianan sa Ginoo makapakurog sa kahadlok, usahay morag mawad-an tag kadasig kay wa tay igong kusog sa pagkab-ot niini, parehas ra sa mga taytayan nga kurdon nga gilabay ug gitisok daw mga espada sa bukid nga bato nga atong gisak-an. Daw gihagit ta sa pagpakigbatok sa pagkinabuhi nga way laing gihunahuna kondili ang kaugalingon lamang; batok sa panghusgar o panglibak sa ubang tawo; batok sa mga mini o artipisyal nga pagpaubos aron mabuksan nato ang utlanan padulong sa dialogo, pagpakighimamat, pagpanlimbasog alang sa katlingbanong kaayohan. Labaw sa tanan naghangyo nga unta ang atong gugma kanunayng bag-o, kansang sukaranan mao ang bato sa gugma ug sa pagkamaunongon sa Dios alang kanato, hangtod nga makaako ta sa pagpaambit sa pagpasaylo. Mao kini ang di-matay-og nga kondisyon aron matukod ang pagtinagdanay nga buhong sa hustisya ug kalinaw taliwala sa mga tawo ug taliwala sa lainlaing katawhan sa kalibotan. Bisan gani ang saksi sa usa ka yanong serbisyo nga inubanan sa gugma, apan tinuoray nga pag-alagad, makahatag ug kahayag sa dalan dinha sa kasingkasing sa uban.

Didto sa Nigeria, samtang nanagtigom ang mga kabatan-onan ug mga katigulangan diin nag-inambitay sila sa ilang mga kasinatian mahitungod sa gugmang pinasikad sa Ebangelyo, ang bata nga ginganlag Maya, misugilon sa tanan: “Gahapon, samtang nagdula kami, gitukmod ko sa usa ka batang lalaki ug nahagbong ko. Ug dayon nangayo siyag pasaylo “Pasaylo-a ko ha?” – ako dayon siyang gipasaylo”. Kining kasinatian nakapaabli sa kasingkasing sa usa ka batan-on, kansang amahan gipatay sa usa ka miembro sa Boko Haram: “Nagsud-ong ko ni Maya. Siya, nga bata pa lamang, nakapasaylo – buot ipasabot nga ako angay usab ug andam nga mopasaylo”!

“Tudloi ako, Ginoo sa mga dalan mo ug ipaila kini kanako”

Kon buot natong itugyan ang atong kaugalingon sa usa ka giya nga kasaligan uban sa atong panaw, hinumdoman nato nga si Jesus mismo misulti bahin sa Iyang kaugalingon: “Ako ang dalan …” (Juan 14:6). Atubangan sa mga kabatan-onan nga nagkatigom didto sa Santiago de Compostela, atol sa Kalibotanhong Adlaw sa mga batan-on niadtong miaging 1989, si Chiara Lubich midasig kanila niining mga pulonga: “[…] Mitug-an si Jesus bahin sa iyang kaugalingon isip “ang Dalan”, nagpasabot kini nga angay tang molakat sa dalan nga iyang gilaktan […]. Makaingon pod ta nga ang dalan nga giagian ni Jesus adunay ngalan: Gugma […] ang gugma nga gisaksi ni Jesus ug iyang gidala dinhi sa kalibotan, usa ka gugma nga espesyal ug di-ikatandi. […] Mao kini ang gugma mismo nga nagdilaab sulod sa Dios. […] Apan kinsay higugmaon? Higugmaa ang Dios sa walay pagduhaduha: mao kini ang unang tulobagon nato. Ug unya higugmaa ang imong isigkatawo. […] Gikan pa sa buntag hangtod sa gabii, ang pagtinagdanay ngadto sa uban angay isaksi inubanan niining matang sa gugma: sa balay, sa unibersidad, sa trabaho, sa lugar para sa sports, samtang nagbakasyon ta, o kon anaa man ta sa simbahan, sa kadalanan, angay gayod natong mataligam-an ang mga higayon nga kita makahatag ug gugma sa uban ingon nga gihigugma nato ang atong kaugalingon. Ilhon nato si Jesus nga anaa kanila, ug dili sal-angan ang uban; hinuon, higugmaa ang tanan ug ikaw ang magpasiugda sa pagtagad sa uban. […] Kutob sa mahimo, tinguhaa nga makasulod ka sa kinahiladman sa imong isigkaingon; sabton pag-ayo ang iyang mga problema, ang iyang mga plano ug gipangandoy, ang mga dili nindot nga nahitabo apil usab ang mga nakalipay kaniya, aron makig-ambit ka sa tanang kahimtang. […] Himoa nga, nianang paagiha, ikaw mao siya. Sama kang Jesus, atong Ginoo, tungod sa gugma, nagpakatawo Siya aron maparehas nato. Morisulta nga ang imong isigkatawo, makaamgo nga may nakasabot kaniya ug makabaton ug kahupayan, kay adunay tawo nga nagpas-an uban kaniya sa bug-at nga mga suliran, ang iyang mga pag-antos ug nakig-ambit sa ginagmayng mga kalipay. “Puy-an nato ang atong isigkatawo”, “puy-an nato ang kinabuhi sa uban”: usa kini ka Ideyal, nga di-ikatandi ug di-matupngan […]”.