Parokya sa Bangkal malipayong nagsaulog sa ika-15 nga kapistahan

Subay sa tema, “Nagkahiusang kaparian ug mga relihiyoso uban ni Birhen Maria, mapadayonong nagpakaylap sa gugma sa Dios ngadto sa tanang katawhan,” ang Our Lady of Lourdes Parish sa Bangkal malipayong nagsaulog sa ika kinse ka tuig sa kapistahan niadtong Pebrero 11, 2018.

Mahinungdanon usab ang kasaulogan tungod sa pagsaulog sa simbahan sa Tuig sa mga Kaparian ug mga Relihiyoso karong tuiga.

Ang selebrasyon sa kapistahan gihimo subay sa siyam ka adlaw na novena niini. Gawas sa liturhikanhong selebrasyon, adunay gipahigayon na program sa unang gabie ang nagkalainlaing eskwelahan ug homeowners association na sakop sa parokya. Dayon misunod ang fun run, fun walk ug zumba sa ikaduhang adlaw nga gisalmutan sa mga parokyano gikan sa 25 ka GKK niini; ug napahigayon gihapon ang dulang basketball sa midget nga gidaugan sa District 2, ug sundowners nga gidaugan sa District 5. Aduna pod gipahigayong dula ang women’s volleyball.

Ang GKK Servant Leaders’ Night sa Biyernes nakapasibaw sa mga nagkalain-laing talento ug mga kadasig gikan sa mga lideres sa GKK; ug ang hudyaka sa mga parokyano misibaw sa mismong adlaw sa piyesta kanus-a gipahigayon ang “Your Face Sounds Familiar Challenge”.

Malipayon ang bagang parokyano sa mismong kapistahan ilabina sa presensya ni Bp. George Rimando nga nagpahigayon og santos nga misa, ug sa halangdong Archbishop Romulo Valles na nagsaulog sa mabolokong Pontifical Mass sa kapistahan sa Our Lady of Lourdes Parish sa Bangkal.

Ang basketball sa mga Davao Clergy batok sa mga OLLP PSL, gipangunahan sa OLLP PSL Coordinator nga si Ruben Sumagang, maoy nagtak-op sa pista sa Our Lady of Lourdes Parish sa gabie sa Pebrero 11 diin Davao Clergy nakakuha og 107 puntos, samtang 104 ang OLLP PSL.

Ang OLLP PSL malipayong nakigdulag basketball sa Davao Clergy na gibidahan nila Fr. Johnny Autida, Fr. Leif Simbahon, Fr. Allan Rodriguez, Fr. Rene Ribac, Fr. Ricky Peñalosa, Fr. Ricky Flores, Fr. Dioscoro Saniel, Fr. Orlando Angelia, Fr. Edsel Paloma, Fr. Roy Mejias, ug uban pa.

Ang kalampusan sa sports activities sa kapistahan sa parokya gipangunahan sa Sports Committee Chairperson nga si Violy Umbay uban ni PDART Coordinator Norjun Bernasor, ug inubanan pod sa suporta sa Service Ministry Coordinator Alice Acebedo ug sa Parish Pastoral Council Coordinator Nestor Fruto. Ang kalampusan sa piyesta sa OLLP ikalipay pag ayo sa ilang kura paroko Padre Dexter Veloso. (Vonz M. Hijada)