KKK

Ikatulong Dominggo sa Kwaresma
Exodo 20:1-17 o 20:1-3, 7-8, 12-17 / 1 Corinto 1:22-25 / Juan 2:13-25

Lisud ang pagpatukod ug gambalay karong panahona. Mahal ang mga materyales ug suhol sa pagpatrabaho. Unsa kahay gipasabot ni Kristo sa iyang pag-ingon nga gub-on ang Templo? Niining ikatulo nga Domingo sa Kwaresma, mamalandong kita sa mosunod nga mga punto.

Kasugoan. Unsa bay tumong sa mga kasugoan sa Ginoo sumala sa unang pagbasa? Dili kini aron kita lisud-lisuron sa pagpasunod niini, kondili ang paggiya nato sa kahapsay. Kung wala kining mga kasugoan, magkaguliyang ang atong relasyon, pagpuyo ug pagpaningkamot. Wala kita’y padulngan. Sama nga ang Ginoo nagluwas sa katawhan gikan sa pagkaulipon, gugma maoy magtukmod kanato sa pagsunod sa mga kasugoan. Dili kini kabug-at, kondili kalipay tungod ug alang sa pagpangga sa Dios.

Kabuang. Unsang klase nga kabuang ang gihisgutan ni San Pablo diha sa ikaduhang pagbasa? Gipakita diha sa krus ang dili masabtan ug dili makab-ot nga gugma ug kaalam sa Ginoo. Siya mipaubos pag-ayo nga mihalad sa tanan nga anaa kaniya aron lamang makuha kita niya pagbalik gikan sa kaulipnan sa sala. Dili angay kahadlokan ug dili angay nga maluya kita kung mahimo kitang mga buang sa mata sa mga tawo kung gihimo nato ang angay nga pagsimba sa Dios ug pagrespeto sa isigkatawo.

Kabalaan. Nganong gilimbuwad man ni Kristo sa hilabihang kasuko ang mga negosyante didto sa Templo nga atong nadungog sa Ebanghelyo? Alang ni Kristo ang Templo balaan. Alang kaniya ang matag tawo templo sa Ginoo. Sa ilang pagnegosyo, gibintahaan ug gilupigan nila ang mga kabus. Motabang unta kita sa pagtukod pag-usab sa kabalaan sa templo sa Ginoo diha sa matag usa kanato pinaagi sa paglikay sa pag-abuso. Gub-on ta unta ang atong pagdumot, pagpamintaha, pagpahimulos ug garbo. Matukod unta nato pag-usab ang kabalaan sa matag-usa pinaagi sa paghimo sa unsay makaayo alang sa kadaghanan.

Sundon ta unta ang dalan sa Ginoo pinaagi sa malipayon nga pagtuman sa iyang mga kasugoan. Magmaisog unta kitang mapuy-an ang kabuang nga nahitabo diha sa krus ni Kristo. Maangkon unta nato ang kabalaan sa tanan natong paningkamot.