“IHMA @ 66: Dobleng saya, Dobleng Pasasalamat”

MATI CITY – Hingpit nga nagmalampuson ang selebrasyon sa ika-66 ka tuig nga kasumaran sa pagkatukod sa Immaculate Heart of Mary Academy (IHMA) ug sa ilang Grand Alumni Homecoming nga gipahigayon niadtong Agosto 23-25, 2013.
Ang tema sa selebrasyon mao ang “IHMA at 66: dobleng saya, dobleng pasasalamat, celebrating life’s best.”
Gipahigayon ang parade nga misubay sa mga nag-unang dalan sa siyudad sa Mati alas 7:00 sa buntag sa Agosto 24, sinalmutan sa mga alumni ug mga estudyante sa IHMA, staff and faculty, Missionaries of the Immaculate Conception (MIC) sisters, ug uban pang stakeholders.
Alas dos sa hapon gihalad ang concelebrated Thanksgiving o Dedication Mass partikular alang sa mga silver (batch 1988) ug golden (batch 1963) jubilarians, nga gipangunahan ni Obispo Patricio Alo; ang procession sa tanan ang misunod niini.
Alas 7:00 sa gabii gisugdan usab ang Alumni Night nga gi-host sa duha ka jubilarian batches, samtang nagtanyag og pasundayag ang mga batches by decade, sama sa batch 1983, 1993, ug 2003.
Nahimong highlight sa program ang turn-over sa batch 88, pinaagi nila ni Vice-Mayor Glenda Rabat-Gayta ug Batch President Juvy Mabini sa tseke nga mobalor og Php100,000 agig donasyon sa batch alang sa mga proyekto sa IHMA.
Sa iyang wali, gipasalamatan ug gidasig sa obispo ang MIC administration sa ilang pagdalit og quality education diin nag-una gayud sa ilang katuyuan mao ang pagtudlo sa gugma sa Diyos ug sa isigka-ingon, alang usab sa pag-andam sa mga tinun-an sa matinud-anon nga pag-atubang ug pagtubag sa mga hagit sa umaabot nga panahon sa ilang kinabuhi—“we are at the service of the Turth and God has really been good to us in this past 66 years.”
Sa iyang mensahe, si Sr. Regina Villarte, MIC, nagpahayag og kalipay sa mga nahimong kabahin sa IHMA, sa ilahang mga estudyante, kung diin nahimong dakung kabahin usab ang IHMA sa pagkab-ot sa katumanan sa ilang mga pangandoy, dugang sa pagdason “nga basta anaa ang determinasyon, kalig-on sa kaugalingon, ug pasensiya sa paghulat, aduna gayo’y makutlo nga mga bunga sa pagpaningkamot.”
Sa Agosto 25, 2013, natigayon usab ang naandan nga field demonstration nga gisalmutan sa mga estudyante sa IHMA.