Pari: Sto. Niño, misteryong gasa sa kinabuhi

Emosyonal nga niabot sa kapilya si Wilfreda Dalanon, 71. Kauban niya ang iyang anak ug mga apo. Excited siya tungod kay karong adlawa, patingugon na g’yud ang sound system nga produkto sa panaghiusa sa katilingban diin siya ang GKK treasurer. Ang iyang debosyon kuno kang Sto. Niño nakapaaghat kaniya nga magpabiling GKK treasurer sa maong GKK.

Si Nanay Dalanon, inubanan sa iyang Pangulo sa Katilingban ug uban pang GKK Servant Leaders gisaulog ang ika-53 nga pista sa GKK Sto. Niño, Libby Road, Bago Gallera, Davao City, Enero 17.

ATIMANON ANG MGA BATA
“Defenseless. Voiceless. Powerless. Kita ang may gahum, kita nga mga hamtong…we are the ones controlling the event for the children.”

Kini ang usa sa mga punto nga gipaambit ni Fr. Roger Duhaylungsod, kura paroko sa San Lorenzo Ruiz Parish, Talomo sa iyang wali atol sa pista.

“Nadungog nato ang tingog sa kalibutan, kwarta, tingog sa bisan unsa natong madungog, apan di nato madungog ang gamay’ng tingog sa atong konsensya. May pang mga bata,” dugang niya.

Dakong impluwensya kuno ang midya sa pag-umol sa atong mga kabataan karon, gani daghang tingog ang madunggan karon nga magpalayo kanato sa Ginoo.

Apan, sumala pa sa pari: “The church would stand bisan pa siya i-criticize, because that is part of our mission sa pagpadayon sa tingog sa Ginoo.”

“Ang total trust and dependence to somebody older than them, mahadlok jud ang mga bata. Kinsa may nagtudlo ana? Kitang mga hamtong,” dugang pa ni Fr. Duhaylungsod, kinsa nagpasalamat nga sa parokya sa San Lorenzo nagapadayon gihapon ang pagbunyag sa mga bata sa parokya matag Dominggo. Niining adlawa, pito ka bata ang gibunyagan sulod sa misa.

Sa pagpaduol sa Pilipinas sa ika- 500 nga kasaulogan sa pagdala sa Kristiyanismo, mensahe ni Fr. Duhaylungsod nga dili lang kutob sa pagsayaw sa Sinulog ang huna hunaon sa katawhan, musayaw sab unta daw sa pagsulbad sa mga isyu kalabot ang mga bata.

Nanghinaut ang pari nga mamahimo ang matag usa nga “childlike” nga adunay “sense of wonder,” mapasalamaton sa kung unsa mang grasya nga muabot.

ANG BATANG HESUS UG BIBLIYA
Sa pikas bahin, lawom ang pagsabot sa Pangulo sa Liturhiya nga si Brod. Cordio Pondias sa tema sa maong kasaulogan. Gasa sa pagtoo bisan sa kalisdanan ang iyang nakutlo. Gani sa traynta ka tuig na sa pagserbisyo, ang batang Hesus ang matud pa, nagauban kaniya. Wa man natuman ang iyang pangandoy nga ma-pari apan malipayon siya nga nagaserbisyo sa maong GKK ug karon sa mas dako nga komunidad isip Bible Apostolate Assistant Coordinator.

“Ang akong pagserbisyo ug ang pagbasa nako sa Bibliya nakapahimo nakong suod sa akong pamilya, katilingban ug Ginoo. Ang makanunayong pagbasa sa Bibliya matag adlaw maoy giya kanako sa pagpangalagad sa pagpaambit usab sa atong kaigsoonan.”

Ang fiesta mass available nga makita sa Facebook Page – DXGN 89.9 Spirit FM-Davao ug nadunggan sa radyo on delayed broadcast.