Disaster preparedness gipakusgan sa Archdiocese of Davao

Seryoso nga gitutokan sa Archdiocese of Davao ang pagpangandam sa panahon nga muabot ang kalamidad.
Niadtong Agosto 23 sa San Pablo Parish, giimbita sila si Emmanuel Jaldon, officer in-charge sa Davao City Disaster Risk Reduction Office Central 911 ug Pipito Capili Administrative Officer Central 911 aron magpaambit sa mga kaparian, kamadrehan ug mga layko mahitungod sa epekto sa maayong pagpangandam ilabi na nga posible nga muabot ang tanang matang sa kalamidad sa Dabaw.

Sa maong seminar gipakita ang posibilidad nga maigo sa kalamidad ang syudad sa Dabaw ilabi na nga 60% sa populasyon ang nakapuyo duol sa coastal areas sa syudad ug duol kini sa mga kalamidad sama sa monsoon, baha, tsunami ug uban pa.
Gitanyag usab sa seminar ang mga early warning systems nga ginapadagan sa mga barangay ilabi na sa kadtong mga lugar nga naapektuhan sa flashflood niadtong 2011 sama sa Matina Pangi.

Pipila ka tawo ang namatay tungod wala sila kaandam sa maong kalamidad ug mao kini ang tumong sa pagpahigayon ug disaster preparedness.

Nakita usab sa seminar nga dako ang kalambigitan sa mga basura ug pagka-kalbo sa mga kalasangan sa mga panghitabo sama sa flashflood ug pagsaka sa tubig kung kusog ang ulan.

Gi-awhag usab ang mga delegado gikan sa nagkalain-laing parokya nga mamahimong aktibo sa pag-bawas sa epekto sa mga kalamidad pinaagi sa tree-planting, emergency kit preparation ug emergency drills nga ginahimo sa pipila ka mga eskwelahan ug kompanya aron mas kahibalo na ang kadaghanan unsa ang buhaton sa panahon nga adunay kalamidad nga moabot.

Ang Archdiocesan Social Action Center ang social services arm sa Archdiocese of Davao ang nangulo sa pagpahigayon sa maong seminar. (John Frances C. Fuentes/@dcherald)