Walang iwanan

Pangilin sa Balaang Pamilya ni Hesus, Maria ug Jose
Sir. 3:2-6, 12-14/ Col. 3:12-21/ Lk. 2:22-40

Walang iwanan. Kini ang pagpadayag sa pagpakig-uban bisan sa mga kalisud ug kasakit. Kini ang pasalig sa hugot nga pag-inunongay bisan sa unsay mahitabo.

Ang Balaang Pamilya ni Hesus, Maria ug Jose sama usab sa tagsa-tagsa nato ka pamilya. Miagi usab sila sa mga pagsulay ug pag-antus. Naglaraw na nga makigbulag sa hilom si Jose sa wala pa sila mag-uban ni Maria. Lisud ilang naagian sa panahon sa pagkatawo ni Hesus sa pobre nga pasungan. Naproblema sila pagkagiw sa Ehipto aron maluwas batok sa mga mopatay sa bata. Nakapangutana si Maria nganu nga ang batang Hesus nawala didto sa Templo.

Apan luyo niining tanan, nagpabilin nga maunongon ang matag usa kanila. Kining pag-unong, una sa tanan, ilang nasinati diha sa kanunay nga pagsimba. Ang ilang paghalad sa ilang kaugalingon sa Ginoo maoy naghatag kanila sa kadasig. Kita kaha nagpabilin ba kita nga mosmiba ug mohalad sa Dios isip usa ka banay bisan na lang matag semana.

Ikaduha, anaa ang pagtahod ug pagsugot diha sa matag usa. Ang pagtahod ni Maria ug Jose sa kabubot-on sa Amahan maoy nagtudlo sa batang Hesus nga magmasinugtanon ug motahod usab sa iyang mga ginikanan. Mao usab kini ang pahimangno diha sa unang pagbasa. Dili unta ang atong kaugalingon lamang maoy kanunay natong palabihon, kondili usab ang makahatag kita’g kalipay sa mga mahal nato sa kinabuhi, ilabina ang membro sa atong pamilya.

Ikatulo, anaa ang pagdawat ug dili ang pagsalikway taliwala sa mga kahuyang. Wala gikwenta sa balaang banay ang pagkulang sa matag usa kanila, apan misalig ang matag usa sa kalig-on ug talento nga naangkon. Mao nga sa ikaduhang pagbasa, giawhag ang mga ginikanan sa paglikay sa pagpalagot sa ilang mga anak. Ang managtiayon mosanong ug mosuporta unta sa matag usa.

Daku ang hagit sa pag-inunongay sa matag pamilya karon, tungod kay ang uban, nahimulag sa matag usa tungod sa trabaho nga atua sa layo. Ang uban bisan ania ra sa duol, nagkatibulaag tungod sa bisyo. Atong paninguhaon nga niining panahon sa Pasko, maanaa unta ang pagsimba sa Dios, pagtahod ug pagdawat sa usa’g usa. Walang iwanan.