Ang Pagpanamkon ni Hesukristo

P: Unsa may gipasabot sa ulay nga pagpanamkon kang Jesùs?
T: Ang ulay nga pagpanamkon kang Jesùs nagapasabot nga si Jesus gipanamkon dinha sa tiyan sa Birhen pinaagi sa gahom lamang sa Espiritu Santo sa walay paghilabot og usa ka lalaki. Siya mao ang Anak sa langitnong Amahan sumala sa iyang diosnong kinaiya ug Anak ni Maria sumala sa iyang tawhanong kinaiya. Hinuon, Siya matuod gayod nga Anak sa Dios dinha sa iyang duha ka kinaiya kay dinha kaniya aduna lamay usa ka Persona, ang Persona nga diosnon.

P: Unsa may kahulogan sa pag-ingon nga si Maria “kanunay nga Ulay”?
T: Si Maria kanunay nga ulay sa kahulogan nga siya “nagpabilin nga birhen sa pagpanamkon niya sa iyang Anak, birhen pagpanganak niya kaniya, birhen sa pagkugos niya kaniya, birhen sa pagpasuso niya kaniya, kanunay siya nga birhen” (San Agustin). Mao nga sa paghisgot sa mga Ebanghelyo mahitungod sa mga “igsoong lalaki ug babaye ni Jesus”, nagapasabot kini sila sa suod nga mga kakaubanan ni Jesus, sumala sa paagi sa pagsulti sa Balaan nga Kasulatan.

P: Sa unsa man nga paagi nga ang espirituhanon nga pagka-inahan ni Maria alang sa tanan?
T: Si Maria may usa lamang ka Anak, si Jesus, apan dinha kang Jesùs ang iyang espirituhanong pagka-inahan naga-lakip sa tanan nga gianhi ni Jesùs aron luwason. Masinugtanon nga nagtindog sa kiliran sa bag-o nga Adan, si Jesucristo. Ang Birhen mao ang bag-o nga Eva, ang matuod nga inahan sa tanang may kinabuhi, nga inubanan sa inahanong gugma nagabulig diha sa ilang pagkatawo ug sa ilang pag-umol sa han-ay sa grasya. Birhen ug Inahan, si Maria maoy larawan sa Simbahan , ang labing hingpit nga katumanan niini.

(Cf. Kompendiyo sa Katekismo sa Simbahang Katoliko, 98-100)