“Walay bisan kinsa nga mahimong akong tinun-an gawas kon iyang biyaan ang tanan niyang katigayonan”. (Lk 14:33)

Ika-23 nga Domingo sa Ordinaryong Panahon
Kaalam 9:13-18/Philemon 9-10,12-17/Lk.14:25-33

Sa duha ka sambingay, gipakita ni Lukas ang pagkamahinungdanon sa pagsota sa kaugalingong desisyon sa pagsunod kang Kristo. Adunay mga butang nga kinahanglan ibilin tungod kay nay mga butang nga mas kinahanglang dal-on sa panaw sa kinabuhi diha sa pagkasumusunod ni Kristo.

Ang pagsunod ni Kristo dili lamang taman sa Jerusalem diin ang uban niyang mga tinun-an naglaum nga didto siya koronahan isip hari, kundili hangtod sa Golgota diin iyang atubangon ang kamatayon sa krus. Ang krus maoy timaan sa pagkamasinugtanon ni Kristo sa iyang Amahan, ug mao usab kini ang naghulat sa iyang mga sumusunod. “Kung kinsa kadtong gusto nga mamahimong akong tinun-an, pas-ana ang krus matag adlaw ug sunod kanako” (Lk 14:27). Ang pagpas-an sa krus matag adlaw mamahimong makahuluganon kung atong gisunod ang lakang ni Kristo. Atong klarohon, una, ang krus nga atong gipas-an kung kang Kristo ba. Daghan karon ang nagpas-an ug bug-at nga krus apan dili diay kang Kristo. Nindot kung atong mahibal-an unsa ang mga “Krus” nga atong gipas-an karon. Atong tan-awon kung kang Kristo ba ni o ato lang mga binuhat. Ikaduha, atong tan-awon diha sa pagpas-an sa krus kung ang atong gisubay mao ba ang lakang ni Kristo. Basin baya nagpunay ta ug pas-an sa krus apan ang atong gisubay nga dalan nagpahilayo hinuon kang Kristo. Diha sa pagkasumusunod kang Kristo, atong kining duha ka butang, ang krus nga pas-anon ug ang dalan nga gisubay diha sa pagpas-an.

Dili sayon ang pagsunod kang Kristo. Gikinahanglan ug kinatibuk-ang pagbag-o sa tawo; bag-ong kasing-kasing, bag-ong huna-huna, bag-ong lihok ug bag-ong kinabuhi. Ang pagbag-o sa kaugalingon tungod sa krus ni Kristo magdala unta sa matag-usa sa kalipay ug grasya sa Gingharian sa Dios.